राज्याच्या सर्वांगीण विकासासाठी शासन कटिबद्ध

संग्रहित छायाचित्र
संग्रहित छायाचित्र

मुंबई : कर्जमाफीपासून वंचित राहिलेल्या जवळपास ३ लाख शेतकऱ्यांना कर्जमाफीचा लाभ, लातूर येथे होणाऱ्या रेल्वे डब्याच्या कारखान्यांमुळे प्रत्यक्षात २५ हजार नोकऱ्यांची निर्मिती आणि पुढील वर्षापर्यंत सर्व बेघरांना हक्काची घरे देण्यासाठी १२ लाख घरे, तसेच पुढील पाच वर्षांत एक लाखापेक्षा अधिक रोजगार निर्मिती या शासनाच्या महत्त्वाकांक्षी निर्णयाची माहिती देतानाच राज्याची सर्वांगीण प्रगती आणि विकास साध्य करण्यासाठी महाराष्ट्र शासन कटिबद्ध असल्याचे प्रतिपादन राज्यपाल सी. विद्यासागर राव यांनी केले. 

शिवाजी पार्क येथे महाराष्ट्र दिनानिमित्त आयोजित मुख्य सोहळ्यात ते बोलत होते. या वेळी राज्यपालांच्या हस्ते ध्वजारोहण झाले. एक प्रभावशाली, प्रगत महाराष्ट्र घडविण्यासाठी शासनाबरोबर सर्वांनी सहभागी होऊन योगदान द्यावे, असे आवाहन करून त्यांनी यावेळी राज्यातील जनतेला शुभेच्छा दिल्या.

या वेळी मुख्यमंत्री देवेंद्र फडणवीस, उद्योग मंत्री सुभाष देसाई, परिवहनमंत्री दिवाकर रावते, शालेय शिक्षण मंत्री विनोद तावडे आदी उपस्थित होते. या वेळी आंतरराष्ट्रीय कामगार दिनानिमित्ताने राज्यपाल यांनी श्रमिक वर्गाला शुभेच्छा दिल्या. राज्य शासन २०२२ पर्यंत शेतकऱ्यांचे उत्पन्न दुप्पट करण्यासाठी बांधिल आहे.

मागेल त्याला शेततळे, जलयुक्त शिवार आणि विहिरी खोदणे यांसारख्या योजना राबवून शासन राज्यभरातील जास्तीत जास्त क्षेत्र सिंचनाखाली आणण्यासाठी सतत प्रयत्न करीत आहे. चालू वर्षात शासनाने २ लाख २६ हजार हेक्टर इतकी सिंचनक्षमता निर्माण करण्याचे आणि पाण्याच्या साठवण क्षमतेत ८५३ दशलक्ष घनमीटरपर्यंत वाढ करण्याचे योजले आहे. काम सुरू असलेले ५० सिंचन प्रकल्प शासन प्राधान्याने पूर्ण करण्यावर भर देत आहे.

कर्जमाफी योजनेअंतर्गत, ५५ लाखांपेक्षा अधिक खातेधारक शेतकऱ्यांना कृषी कर्जमाफी देण्यात आली आहे. त्यापैकी साडेसेहेचाळीस लाख खातेधारक शेतकऱ्यांना याचा प्रत्यक्ष लाभ झाला आहे. आतापर्यंत, १४ हजार ७८९ कोटी रुपये इतकी रक्कम, ३७ लाख २० हजार लाभार्थी शेतकऱ्यांच्या खात्यांत जमा करण्यात आल्याचे राज्यपाल यांनी सांगितले. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com