नागपुरात हरभरा प्रतिक्विंटल ४६०० ते ५१०० रुपये

नागपूर ः लुचई तांदळाचे दर स्थिर असून, हरभरा व तुरीच्या दरात किरकोळ घसरण बाजारात नोंदविली गेली. येत्या काळात यात काही अंशी वाढ होण्याची शक्‍यता व्यापाऱ्यांकडून वर्तविण्यात आली. हरभऱ्याची १०० ते १४० क्‍विंटलची आवक होत असून, हरभऱ्याचे दर ४६०० ते ५१०० रुपये प्रतिक्‍विंटल आहेत.  बाजारात शेतमालाची आवक काहीशी मंदावली आहे. बाजाराला नव्या हंगामातील शेतमालाचे वेध लागले आहेत. त्यानंतरच बाजारात तेजी येईल, असे व्यापारी सांगतात. लुचई तांदूळ १४० ते १५० क्‍विंटलची आवक होत असून १९०० ते २२०० रुपये प्रतिक्‍विंटलचा दर या तांदळाला आहे.  गेल्या आठवडाभरापासून याच दराने तांदळाचे व्यवहार होत आहेत. तुरीची आवक कधी कमी; तर कधी जास्त होत असून १८० क्‍विंटल; तर कधी ५९५ क्‍विंटल असे चढ-उतार तुरीच्या आवकेत होत आहे. ३५०० ते ३९७० रुपये प्रतिक्‍विंटलने तुरीचे व्यवहार होत आहेत. दरात किरकोळ वाढीची शक्‍यता व्यापाऱ्यांनी वर्तविली. मुगाची खरेदी ५००० ते ५५०० रुपये प्रतिक्‍विंटलने होत असून आवक जेमतेम १५ ते २० क्‍विंटलची आहे.  भूईमूग शेंगाची १०० ते १६० क्‍विंटल आवक आहे. ३००० रुपये प्रतिक्‍विंटल असलेल्या शेंगाच्या दरात १०० रुपयांची घट नोंदविण्यात  आली. २९०० रुपये प्रतिक्‍विंटलने भुईमूग शेंगाचे व्यवहार होत आहेत. सोयाबीनची आवक १५० ते २०० क्‍विंटलची आहे. २४५० ते २८५० रुपये प्रतिक्‍विंटलने सोयाबीनच्या दरातदेखील चढ-उतार होत असल्याचे व्यापारी सांगतात.