जळगावमध्ये एकच शासकीय खरेदी केंद्र

जळगाव : जिल्ह्यात नाफेडचे एकच हरभरा खरेदी केंद्र मार्केटिंग फेडरेशनच्या माध्यमातून सुरू आहे. इतर ११ केंद्रे सुरू करण्याचा मुहूर्त अजूनही निश्‍चित झालेला नाही. यातच खासगी बाजार किंवा बाजार समित्यांमध्ये हरभऱ्याचे दर स्थिर आहेत. 

काबुली हरभऱ्याला ५५०० रुपये प्रतिक्विंटल तर इतर हरभऱ्याला प्रतिक्विंटल ३००० ते ३४०० रुपये प्रतिक्विंटलचा दर आहे. बाजार समित्यांमध्ये आवकेत वाढ होत आहे. मार्च महिन्यात जळगाव बाजार समितीमध्ये प्रतिदिन ५०० क्विंटल आवक झाली. काबुली हरभऱ्याची फारशी आवक नव्हती, तर चोपडा व अमळनेर बाजार समितीमध्ये प्रतिदिन ८०० क्विंटलपर्यंत आवक झाली. सर्वच बाजार समित्यांमध्ये हरभऱ्याचे दर स्थिर आहेत. 

इंदूरलाही दर स्थिर इंदूर येथील बाजार समितीमध्येही काबुली हरभरा व इतर हरभऱ्याचे दर स्थिर आहेत. तेथे काबुली हरभऱ्याला प्रतिक्विंटल ५६५० रुपये प्रतिक्विंटलचा दर आहे. बऱ्हाणपूर बाजारातही दर स्थिर असल्याची माहिती मिळाली. 

शासकीय केंद्रांची संख्या केव्हा वाढेल? शासकीय हरभरा खरेदी केंद्रांची संख्याही जिल्ह्यात वाढलेली नाही. सध्या फक्त भडगाव येथे खरेदी केंद्र सुरू आहे. जिल्ह्यात १२ हरभरा खरेदी केंद्रांना मंजुरी मिळाली आहे. त्यात चाळीसगाव, यावल, रावेर, जळगाव, पाचोरा, अमळनेर, चोपडा, मुक्ताईनगर, बोदवड, पारोळा, जामनेर यांचा समावेश आहे. यातील पारोळा व इतर दोन केंद्रे या आठवड्यात सुरू करण्याचे नियोजन मार्केटिंग फेडरेशनने केले होते; परंतु भडगाव वगळता कोणतेही केंद्र सुरू झाले नाही. तुरीची आवक कमी झाल्यानंतर हरभरा खरेदी केंद्रे सुरू केली जातील, अशी माहिती सूत्रांनी दिली आहे.