नवउद्योजकांना प्रोत्साहन देण्यासाठी जेसीबीचे वाटप

सोलापूर  : "जलयुक्त शिवारच्या कामांना व्यवसायाची जोड देऊन सक्षम उद्योजक बनविण्यासाठी शासनाने जलसमृद्धी यंत्रसामग्री व्याज अर्थसाह्य योजना आणली. राज्यभरातील नवउद्योजकांना प्रेरणा आणि प्रोत्साहन देण्यासाठीच या योजनेतून जेसीबी वाटपाचा निर्णय सरकारने घेतला,'''' अशी माहिती राज्याचे सहकार व पणनमंत्री सुभाष देशमुख यांनी येथे दिली. 

राज्य शासनाच्या सहकार विकास महामंडळामार्फत जलयुक्त शिवार अभियान, जल व मृद संधारणाची कामे करण्यासाठी जलसमृद्धी यंत्रसामुग्री (अर्थ मूव्हर्स) व्याज अर्थसाह्य योजनेअंतर्गत राज्यभरात जिल्हानिहाय १ हजार जेसीबी यंत्र देण्याचे नियोजन केले असून, सुशिक्षित बेरोजगार तरुण, शेतकरी उत्पादक कंपनी, शेतकरी गट, विविध कार्यकारी संस्था यांना सदर योजनेचा लाभ घेता येणार आहे. 

नुकताच अतिरिक्त जिल्हाधिकारी रामचंद्र शिंदे यांच्या उपस्थितीत या योजनेचा लकी ड्रॉ काढण्यात आला. राज्यात पहिल्यांदाच या योजनेची सुरवात सोलापुरातून होत आहे. या योजनेच्या माध्यमातून २५ जेसीबीचे वाटप जिल्ह्यातील नवउद्योजक तरुणांना करण्यात आले. त्या वेळी मंत्री देशमुख बोलत होते. या वेळी भाजपचे जिल्हाध्यक्ष शहाजी पवार, जिल्हा उपनिबंधक अविनाश देशमुख, उपविभागीय कृषी अधिकारी उन्मेष बिराजदार, उपकार्यकारी अभियंता पी. एस. पाटील, भाजपचे दक्षिण सोलापूर तालुकाध्यक्ष रामप्पा चिवडशेट्टी, सचिन कल्याणशेट्टी, नगरसेवक संतोष भोसले, नगरसेविका अश्विनी चव्हाण आदी उपस्थित होते.

या योजनेबाबत मंत्री देशमुख म्हणाले, "तरुणांनी या यंत्राचा योग्य पद्धतीने व्यावसायिक वापर करून आपले उत्पन्न वाढवावे. अधिकाधिक तरुणांनी याचा लाभ घ्यावा, त्यासाठी पात्र लाभार्थ्यांना वित्तीय संस्थेकडून यंत्रसामुग्रीसाठी सुमारे १७ लाख ६० हजार रुपये १२ टक्के व्याजदराने देण्यात येते. अर्थात, त्यात लाभार्थी हिस्सा म्हणून २० टक्के रक्कम भरणे आवश्‍यक आहे. या योजनेमध्ये राज्य शासनाकडून कमाल व्याज परतावा रक्कम ही पाच वर्षांसाठी ५ लाख ९० हजार इतकी देण्यात येणार आहे. तसेच, पात्र लाभार्थ्यांना अर्थ मुव्हिंग मशीन संदर्भात राज्य शासनाच्या कौशल्य विकास विभागाच्या माध्यमातून प्रशिक्षण देण्यात येणार आहे.''''