आधी पेमेंट द्या; अन्यथा कामकाज करू देणार नाही

नाशिक  : उमराणे बाजार समितीत शेतकऱ्यांचे लाखो रुपये व्यापाऱ्यांकडे अडकून पडले आहेत. शेतकऱ्यांचे हे पैसे अदा झाल्याशिवाय बाजार समितीचे कामकाज चालू देणार नाही, असा इशारा शेतकऱ्यांनी दिला आहे.

उमराणे येथील कृषी उत्पन्न बाजार समितीत धनादेशप्रकरणी फसवणूक झालेले शेतकरी आणि व्यापारी, संचालक मंडळ व अधिकाऱ्यांची संयुक्त बैठक येत्या आठवड्यात घेणार असल्याची माहिती संचालक प्रशांत देवरे यांनी दिली. संपर्क साधण्याच्या आवाहनानुसार १७५ शेतकऱ्यांनी माल विक्रीची पावती, धनादेश, धनादेश बाउन्स पावती यांच्या छायांकित प्रती जमा केल्यात. अद्यापही ३६ व्यापाऱ्यांकडे सुमारे ८५ लाख रक्कम थकीत आहे.

बाजार समितीची मार्च अखेर व्यापाऱ्यांकडे १० कोटी २५ लाख रक्कम थकीत आहे. परवाना नूतनीकरण करताना वसुलीसाठी प्रशासन गांभीर नसल्याचा आरोप करण्यात येत आहे. 

उमराणे बाजार समितीत शेतकऱ्यांना कांदा विक्रीचे पैसे धनादेशद्वारे देण्यात येत आहेत. परंतु बहुतांश व्यापाऱ्यांकडील धनादेश बाउन्स होत असल्याने लाखो रुपये अडकले आहेत. याबाबत संचालक प्रशांत देवरे यांनी बाजार समितीतील धनादेश बाउन्स, मार्केट फी, विकासकामे, व्यापारी परवाने आदींबाबत जिल्हा उपनिबंधक व बाजार समितीकडे लेखी तक्रार केली होती. त्याची चौकशी सुरू आहे. 

बाजार समितीचे संचालक प्रशांत देवरे म्हणाले, की शेतकरी संकटात आहे. त्यांचे पैसे मिळवून देण्याची जबाबदारी आहे. व्यापारी रोख पैसे देण्याच्या तयारीत असताना ठराविक व्यापाऱ्यांचे हितसंबंध जपण्यासाठीच प्रशासन व व्यापारी असोसिएशन रोख पैसे देण्याचे लांबणीवर टाकत असल्याचा आरोपही त्यांनी केला आहे. शेतकऱ्यांना न्याय मिळवून देण्यासाठी हा लढा आहे. १ जानेवारी, मार्च, मेपासून रोखीने व्यवहार सुरू करू, असे तारीख पे तारीख वायदे प्रशासनाने केल्याचेदेखील त्यांनी सांगितले.