जळगावात मूग ४००० ते ४२०० रुपये क्विंटल

जळगाव ः येथील कृषी उत्पन्न बाजार समितीमध्ये उडीद व मुगाला सारखेच म्हणजेच ४००० ते ४२०० रुपये प्रतिक्विंटलचे दर मिळाले. मुगाची आवक सरत्या आठवड्यात कमी झाली; पण उडदाची आवक मात्र कायम होती.  मध्यंतरी बाजार समितीला हमीभावापेक्षा कमी दरात किती धान्याची विक्री झाली व बाजार समितीने काय कारवाई केली, अशी विचारणा करणारे पत्र शासनाने दिल्याने लिलाव बंद होते. मागील आठवड्याच्या सुरवातीला बाजार किंवा लिलाव सुरळीत झाले; पण दर मात्र फारशे वाढले नाहीत. मुगाची प्रतिदिन आवक सरासरी ३०० क्विंटल राहीली, तर उडदाची आवक प्रतिदिन ६०० क्विंटल एवढी राहिली. सोयाबीनची आवक मात्र अद्याप सुरू झालेली नाही. त्यामुळे सोयाबीनचे दर बाजार समितीमध्ये जाहीर झाले नाहीत.  कोथिंबीरला मात्र चांगले दर मिळाले. कोथिंबीरला ३५०० ते ८००० व सरासरी ६५०० रुपये प्रतिक्विंटल दर राहिला. आवक प्रतिदिन पाच क्विंटल अशी होती. मिरचीला ८०० ते १६०० रुपये प्रतिक्विंटल दर मिळाला. आवक प्रतिदिन ४० क्विंटल अशी होती. टोमॅटोची आवकही स्थिर दिसून आली, टोमॅटोला ८०० ते १५०० दर मिळाला. सरासरी आवकेचे प्रमाण ३० क्विंटल असे राहिले. कांदे, बटाटे यांची आवकही स्थिर होती. भेंडीची आवक मात्र फारशी नव्हती. बटाट्याला सरासरी ४०० रुपये प्रतिक्विंटल दर मिळाला. तर आवक प्रतिदिन १८० क्विंटल अशी होती.  केळीला अपेक्षित दरांची प्रतीक्षा केळीला अपेक्षित दर मिळाले नाहीत. रावेर कृषी उत्पन्न बाजार समितीने जाहीर केल्यानुसार २५ सप्टेंबर रोजी नवती केळीचे दर प्रतिक्विंटल १०२५ रुपये होते. २६ रोजी त्यात २५ रुपयांनी क्विंटलमागे घट नोंदविण्यात आली. २६ सप्टेंबर ते १ ऑक्‍टोबरपर्यंत केळीचे दर स्थिर होते. १००० रुपये प्रतिक्विंटल, असा दर मिळाला; पण सोमवारी (ता.२) दरात पुन्हा २५ रुपये प्रतिक्विंटल, अशी घट झाली व दर ९७५ रुपये प्रतिक्विंटलपर्यंत आले.