बोंड अळी रोखण्यासाठी सामूहिक प्रयत्नांची गरज

हिंगोली (प्रतिनिधी)ः कपाशीवरील गुलाबी बोंड अळीचे नियंत्रण करण्यासाठी सामूहिक प्रयत्नांची गरज असल्याचे प्रतिपादन वसंतराव नाईक मराठवाडा कृषी विद्यापीठातील कृषी विद्यावेत्ता डाॅ. यू. एन. आळसे यांनी केले.

हिंगोली येथील जिल्हा परिषदेच्या सभागृहामध्ये कृषी विभाग, आत्मा, जिल्हा परिषदेचा कृषी विभाग यांच्यातर्फे गुलाबी बोंड अळीच्या नियंत्रणासाठी क्षेत्रीय कर्मचाऱ्यांची कार्यशाळा गुरुवारी (ता.26) आयोजित करण्यात आली होती. या वेळी डाॅ. आळसे बोलत होते. या वेळी जिल्हा अधीक्षक कृषी अधिकारी व्ही. डी. लोखंडे, जिल्हा परिषदेचे कृषी विकास अधिकारी अंकुश डुबल, कृषी उपसंचालक श्री. लाडके, आत्माचे प्रकल्प उपसंचालक एम. डी. तीर्थकर, केव्हीकेचे डाॅ. पी. पी. शेळके, राजेश भालेराव, अजय सुगावे आदी उपस्थित होते.

डाॅ. आळसे म्हणाले, की एकात्मिक कीड व्यवस्थापन पद्धतीने शेंदऱ्या बोंड अळीचे नियंत्रण करता येते. लागवडीपूर्वी खोल नांगरट करावी, फेरपालट करावा, कमी कालावधीत येणाऱ्या वाणांची लागवड करावी. एका गावात शक्य असेल तर एकाच वाणाची लागवड करावी. बी. टी. कपाशीभोवती आश्रय पिकांची लागवड करावी. त्यामुळे बोंड अळीला खाद्य मिळते.

स्वच्छता मोहीम राबवावी, मशागतीची कामे वेळेवर करावीत. जैविक मित्र किडींचे हेक्टरी 1.5 लाख अंडी कपाशीच्या शेतामध्ये तीन टप्प्यांत सोडण्यात यावीत. पाने, लागण्याच्या काळात निंबोळी अर्काची फवारणी करावी. फेरोमेन ट्रॅप, लाइट ट्रॅप आदींचा सामूहिकरित्या वापर केल्यास बोंड अळीचे नियंत्रण शक्य आहे. जिनिंग फॅक्टरीमध्ये लाइट आणि फेरोमेन ट्रॅप लावावेत. त्यामध्ये बोंड अळीचे पतंग पकडून ते नष्ट करावेत. सामूहिकरित्या प्रयत्नातून बोंड अळीचे नियंत्रण शक्य आहे, असे डाॅ. आळसे यांनी नमूद केले.