संकेश्‍वर ऊस संशोधन केंद्राच्या नव्या ऊस जाती

संकेश्‍वर, जि. बेळगाव ः कर्नाटक राज्यातील धारवाड कृषी विद्यापीठाच्या संकेश्‍वर (जि. बेळगाव) येथील ऊस संशोधन केंद्राने शेतकरी आणि साखर कारखान्यांची गरज लक्षात घेऊन आठ ते नऊ महिन्यांत तयार होणारी, उत्पादन आणि साखर उताऱ्यात सरस असलेली एसएनके ०९२११ तसेच १२ ते १४ महिन्यांच्या मध्यम कालावधीत पक्व होणारी एसएनके ०९२२७ आणि १२ ते १६ महिन्यांत पक्व होणारी एसएनके ०९२९३ या जाती विकसित केल्या आहेत. संकेश्‍वर ऊस संशोधन केंद्रातील मुख्य ऊस पैदासकार डॉ. संजय पाटील याबाबत म्हणाले, की गेल्या आठ वर्षांच्या कालावधीत या ऊस जातींच्या विविध स्तरावर चाचण्या घेण्यात आल्या. प्रचलित ऊस जातींपेक्षा या जाती ऊस उत्पादन आणि साखर उताऱ्यात सरस ठरल्या आहेत. प्रचलित जातींमधील लवकर येणारा फुलोरा, पानावरील कुसळ, पाण्याचा ताण सहन न करण्याची क्षमता, कमी फुटवा, कमी उगवण क्षमता हे दोष नवीन जातींमध्ये दिसत नाहीत. या जातींमध्ये ऊस पक्वतेचा कमी कालावधी, ऊस उत्पादन आणि साखर उताऱ्यात वाढ हे गुणधर्म आहेत. कर्नाटकमध्ये लागवडीसाठी शिफारस संकेश्वर येथील ऊस संशोधन केंद्राने विकसित केलेल्या एसएनके ०९२११, एसएनके ०९२२७ आणि एसएनके ०९२९३ या जातींची सध्या कर्नाटक राज्यामध्ये लागवडीसाठी शिफारस आहे. आम्ही दोन वर्षांपूर्वी अखिल भारतीय स्तरावर या तीन जाती विविध राज्यांतील ऊस संशोधन केंद्रांमध्ये शास्त्रीय चाचणीसाठी दिलेल्या आहेत. यंदाच्या वर्षी त्याचे निष्कर्ष हाती येतील, असे डॉ. संजय पाटील ( ऊस पैदासकार, ऊस संशोधन केंद्र, संकेश्वर, जि. बेळगाव) यांनी सांगितले.