कांदा बीजोत्पादनाला दारव्हा तालुक्‍यातील शेतकऱ्यांची पसंती

दारव्हा, जि. यवतमाळ : अस्मानी व सुलतानी संकटांमुळे शेतकरी पार खचून गेले आहेत. त्यामुळे तालुक्‍यातील खोपडी (बु.) येथील शेतकऱ्यांनी पारंपरिक पिकांना फाटा देत कांदा बीजोत्पादनाला पसंती दिली आहे. यातून त्यांना आर्थिक उन्नतीचा मार्ग गवसला आहे.

नापिकीच्या गर्तेत सापडलेले शेतकरी कांदा बीजोत्पादनाकडे वळले असून, पुढील वर्षी लागवड क्षेत्रात वाढ होण्याची शक्‍यता आहे. दारव्ह्यापासून अवघ्या पाच किलोमीटर अंतरावर खोपडी (बु.) गाव आहे. येथील शेतकरी नवनवीन प्रयोगांसाठी ओळखले जातात. यंदा सहा शेतकऱ्यांनी कांदा बीजोत्पादनाचा निर्णय घेतला. नोव्हेंबर महिन्याच्या पंधरवड्यात त्यांनी लाल कांदा रोपांची लागवड केली. 

दीपक क्षीरसागर यांनी नोव्हेंबरच्या अखेर या बीजोत्पादन कांद्याची चार एकरांत लागवड केली. सुरवातीला जळगाव येथून चार एकरांसाठी ५५ क्विंटल फुरसुंगी लाल कांद्याची १७०० रुपये दराने खरेदी करून लागवड केली. त्यानंतर निंदण, खत, फवारणी, पाणी, मजूर, तोडणी आदी सर्व बाबींवर अडीच लाखांचा खर्च अपेक्षित आहे. प्रतिएकर पाच क्विंटल, असे एकूण चार एकरांत वीस क्विंटल कांदा बीजोत्पादन होईल, असा अंदाज आहे. पंचवीस हजार रुपये प्रतिक्विंटलने हे कांदाबीज जळगाव येथील एक कंपनी खरेदी करणार आहे, तसा करार शेतकऱ्यांसोबत झाला आहे. 

खर्च वजा जाता चार एकरांत साडेचार महिन्यांत अडीच लाख निव्वळ नफा होईल, असा विश्‍वास क्षीरसागर यांनी व्यक्त केला. क्षीरसागर यांच्यासह भरत घोंगे यांनी एक एकर, जयेश मिरासे यांनी पाच एकर, गजानन घाटे यांनी एक एकर, राजू पुसदकर यांनी एक एकर, तर शेषराव सावंत यांनी दोन एकरांत कांदा बीजोत्पादन घेतले आहे. पारंपरिक पीक पद्धतीला फाटा देत या शेतकऱ्यांनी या वर्षी कांदा बीजोत्पादन करून आपल्या उत्पादनात वाढ केली.

जिल्हाधिकाऱ्यांच्या आवाहनाला प्रतिसाद वॉटर कप स्पर्धेच्या निमित्ताने नुकतीच जिल्हाधिकारी डॉ. राजेश देशमुख यांनी गावाला भेट दिली. या वेळी पारंपरिक पिकांना फाटा देत वेगवेगळ्या पीकपद्धतीचा अवलंब करावा, असे आवाहन शेतकऱ्यांना केले होते, त्याचाच परिणाम म्हणून हळद पीक घेण्याचा निर्णय शेतकऱ्यांनी घेतला आहे. 

हळद पिकासंदर्भात माहिती घेऊन कळमनुरी येथून बियाणे आणले आहे. कांदा बीजोत्पादनाबरोबर आम्ही आता हळद पीकदेखील घेणार आहोत. शेतकऱ्यांनी पारंपरिक पीकपद्धतीला फाटा देत वेगवेगळ्या पीकपद्धतीचा अवलंब केल्यास निश्‍चितच फायदा होतो. - भरत घोंगे, शेतकरी, खोपडी (बु.)