हरभरा खरेदीची केवळ नोंदणीच

औरंगाबाद : मराठवाड्यातील औरंगाबाद, जालना, लातूर व उस्मानाबाद या चार जिल्ह्यांत हरभरा खरेदीसाठी केवळ शेतकऱ्यांची ऑनलाइन नोंदणीच सुरू आहे. बीड जिल्ह्यातील तीनच खरेदी केंद्रांवर थोडीबहुत हरभऱ्याची हमी दराने खरेदी झाल्याचे समोर आले आहे. 

मराठवड्यात हमी दराने तुरीची खरेदी सुरू आहे. ही खरेदी अंतिम टप्प्यात असतानाच शासनाने हरभऱ्याचीही हमी दराने खरेदी करण्याची घोषणा केली आहे. हरभऱ्याच्या हमी दराने खरेदीसाठी शेतकरी उत्सुक असले तरी तूर खरेदीसाठी जशी जागेची अडचण येते आहे तशीच अडचण हरभरा खरेदी सुरू झाल्यास येऊ शकते. त्यामुळे अजूनही औरंगाबाद, जालना, उस्मानाबाद व लातूर जिल्ह्यात हरभऱ्याची अजून खरेदीच सुरू झाली नसल्याची माहिती सूत्रांनी दिली.

बीड जिल्ह्यातच अंबाजोगाई आणि आष्टी व कडा या तीन खरेदी केंद्रांवरच ३६२ शेतकऱ्यांचा ५२२१ क्‍विंटल हरभरा खरेदी केला गेला आहे. त्यामध्ये कडा येथील केंद्रावर ४२ शेतकऱ्यांचा ४६३ क्‍विंटल, आष्टी येथील केंद्रावर १७७ शेतकऱ्यांचा १६६६ क्‍विंटल; तर अंबाजोगाई येथील खरेदी केंद्रावरून १४३ शेतकऱ्यांचा ३०९२ क्‍विंटल हरभरा हमी दराने खरेदी करण्यात आला आहे. 

बीड जिल्ह्यात हरभऱ्याच्या खरेदीला मुहूर्त मिळाला असला, तरी खरेदी केलेला हरभरा साठवायला गोडाऊनमध्ये जागाच शिल्लक नाही. त्यामुळे खरेदी केलेला सर्व हरभरा खरेदी केलेल्या केंद्रावरच पडून आहे. अर्थात जोवर तो गोदामात साठवीला जात नाही, तोवर त्या मालाचा मोबदला मिळण्याची प्रक्रिया सुरू होऊ शकत नाही अशी स्थिती आहे.