हस्त बहारातील डाळिंबाला २० ते ३० रुपयांनी अधिक दर

सांगली  ः राज्यातील मृग, हस्त बहारातील डाळिंब संपली आहेत. सध्या उशिरा हस्त बहरातील डाळिंब बाजारपेठेत दाखल झाली आहेत. गतवर्षी याच हंगामातील डाळिंबाला ७० ते ८० रुपये असा दर होता. यंदाच्या उशिरा हस्त बहारातील डाळिंबाला २० ते ३० रुपये अधिक दर म्हणजे प्रति किलोस ९० ते ११० रुपये असा दर मिळत असल्याने डाळिंब उत्पादक शेतकऱ्यांच्यात आनंदाचे वातावरण निर्माण झाले आहे.

राज्यातील सुमारे २५ टक्के डाळिंब उत्पादक शेतकरी उशिरा हस्त बहारातील डाळिंब पीक घेतात. या बहरात डाळिंबाला अधिक दर मिळतो. गेल्यावर्षी पाऊस आणि वातावरण चांगले होते. यामुळे डाळिंबाच्या उत्पादनात वाढ झाली होती. यामुळे उशिरा हस्त बहारातील डाळिंबाच्या दरात घसरण झाली होती. त्यामुळे डाळिंब उत्पादक शेतकऱ्यांना आर्थिक तोटा सहन करावा लागला होता. मात्र, यंदा उशिरा पाऊस, दिवाळीनंतर अवकाळी पावसाचा फटका डाळिंबाला बसला. त्यामुळे उत्पादनात १० ते १५ टक्‍क्‍यांनी घट होण्याची शक्‍यता असून यामुळे डाळिंबाच्या दरात तेजी आली आहे. 

सध्या डाळिंबाला मागणी वाढली आहे. त्यातच डाळिंबाच्या उत्पादनात घटीची शक्‍यता आहे. यामुळे उशिरा हस्त बहारातील डाळिंबाचे दर वाढले आहेत. त्यामुळे शेतकऱ्यांनी बाजार समितीत डाळिंबाची विक्री करण्याऐवजी थेट बांधावरच विक्री करण्यास पसंती देत आहेत. डाळिंबाची खरेदी करण्यासाठी व्यापारी थेट शेतकऱ्यांच्या बांधावर खरेदी होत असल्याने डाळिंबाला प्रतिकिलोस सरासरी १०० रुपये इतका दर मिळू लागला आहे.