कृषिपंपांच्या वीज थकबाकीवरून मंत्र्यांमध्ये खडाजंगी

मुंबई  ः सुमारे २३ हजार कोटी रुपयांच्या कृषी वीजबिल थकबाकीवरून मंगळवारी राज्य मंत्रिमंडळाच्या बैठकीत वित्तमंत्री सुधीर मुनगंटीवार आणि ऊर्जामंत्री चंद्रशेखर बावनकुळे यांच्यात खडाजंगी झाल्याचे समजते. 

शेतकऱ्यांकडून वीजबिलाचा भरणा होत नसल्याचा मुद्दा उपस्थित करत मुनगंटीवार यांनी थकबाकी अशीच राहिली तर ऊर्जा प्रकल्पांना अपेक्षित निधी मिळणार नाही, अशी भूमिका घेतली. तर शेतकऱ्यांच्या आत्महत्या होत असताना थकबाकीमुळे वीज खंडित केली तर त्याचे दुष्पारिणाम होतील, असा इशारा बावनकुळे यांनी दिला.

राज्य मंत्रिमंळाच्या बैठकीत शेतकऱ्यांना उच्चदाब वितरण प्रणालीतून वीज देण्याचा प्रस्ताव चर्चेला आला. या प्रस्तावाची माहिती बैठकीत दिली जात असताना मुनगंटीवार यांनी प्रणालीसाठी येणारा खर्च जास्त असल्याचा मुद्दा उपस्थित केला.

शेतकऱ्यांना वीज देण्यासाठी खर्च वाढत असताना कृषिपंपधारकांकडून वीजबिलांचा भरणा होत नसल्याकडे मुनंगटीवार यांनी लक्ष वेधले. यावर खुलासा करताना चंद्रशेखर बावनकुळे यांनी विरोधी पक्षाकडून शेतकऱ्यांना उद्देशून होत असलेल्या आवाहनाचा मुद्दा मांडला. शेतकऱ्यांना वीजबिल भरू नका, असे आवाहन केले जात आहे. त्यामुळे वीजबिलांचा भरणा होत नाही. शेतकऱ्यांकडून वीजबिलाची वसुली करण्यात अडचणीत येत आहेत, असे सांगत बावनकुळे यांनी आपली हतबलता व्यक्त केली.

यावर वीजबिल वसुलीची जबाबदारी कशी घ्यायची, ती घ्या पण बिलांचा भरणा झालाच पाहिजे. तो न झाल्यास प्रकल्पांना निधी देणे शक्य नाही, असा इशारा मुनगंटीवार यांनी दिला. भाजपच्या दोन ज्येष्ठ मंत्र्यांच्या वादात प्रस्तावावरील चर्चा सुमारे ४५ मिनिटे लांबली. अखेर मुख्यमंत्री देवेंद्र फडणवीस यांनी हस्तक्षेप करत शेतकऱ्यांना वीजबिल भरण्यासाठी आवाहन करण्याची सूचना बावनकुळे यांना केली.