बीजोत्पादन अनुदानाचा प्रश्‍न दहा दिवसांत मार्गी लावणार

अकोला (प्रतिनिधी) ः शेतकरी उत्पादक कंपन्यांना बीजोत्पादनासाठी उत्पादन व वितरण अनुदान मिळावे म्हणून शनिवारी (३१ मार्च) खामगाव येथे कृषिमंत्र्यांच्या घरासमोर आत्मदहन आंदोलनाचा प्रयत्न केला होता. पोलिसांनी वेळीच हस्तक्षेप करून आंदोलन टाळले. यानंतर शेतकरी उत्पादक कंपन्यांच्या प्रतिनिधींनी कृषिमंत्री पांडुरंग फुंडकर यांची भेट घेत आपला प्रश्‍न मांडला. येत्या दहा दिवसांत हे अनुदान दिले जाईल, असे आश्‍वासन श्री. फुंडकर यांनी दिले असल्याची माहिती रिसोड तालुक्‍यातील बाळनाथ कंपनीचे विलास गायकवाड यांनी दिली. 

वाशीम जिल्ह्यातील शेतकरी उत्पादक कंपन्या, गटांनी गेल्या हंगामात उत्पादित केलेल्या बीजोत्पादनासाठीचे उत्पादन व वितरण अनुदान थकले होते. शासनाने ऐनवेळी हे अनुदान न देण्याबाबत परिपत्रक काढल्याने या उत्पादकांना मोठा आर्थिक फटका सहन करावा लागला. आर्थिक अडचणीत आलेल्या कंपनी संचालकांनी तालुक्‍यापासून मंत्रालयापर्यंत पाठपुरावा केला.

तसेच मुख्यमंत्री, कृषिमंत्र्यांकडे निवेदने दिली. मागणीसाठी ३१ मार्च रोजी खामगाव येथे कृषिमंत्री पांडुरंग फुंडकर यांच्या निवासस्थानासमोर आत्मदहन आंदोलन करण्याचा प्रयत्न केला. पोलिसांनी वेळीच हस्तक्षेप करीत आंदोलकांना रोखले. त्यानंतर काही प्रतिनिधींनी कृषिमंत्री श्री. फुंडकर यांची भेट घेतली. 

या बैठकीत थकीत अनुदानाच्या अनुषंगाने सविस्तर चर्चा झाली. मंत्र्यांनी आगामी दहा दिवसांत हा प्रश्‍न मार्गी लावल्या जाईल, त्यादृष्टीने वरिष्ठ अधिकाऱ्यांना सूचना केल्या आहेत. सुमारे ५५ लाख रुपये अनुदान सध्या थकलेले आहे. हे अनुदान मंत्र्यांच्या आश्‍वासनाप्रमाणे दहा दिवसांत मिळाले नाही तर पुन्हा आम्हाला आंदोलनाशिवाय पर्याय नसल्याचे श्री. गायकवाड यांनी सांगितले.