खरिपासाठी पुरेसे बियाणे, खते उपलब्ध करून द्या

वाशीम : आगामी खरीप हंगामात शेतकऱ्यांना दर्जेदार बियाणे व खतांसाठी कृषी विभागाने विशेष खबरदारी घ्यावी, अशा सूचना वाशीमचे पालकमंत्री संजय राठोड यांनी केली. येथे आयोजित खरीप हंगामपूर्व आढावा बैठकीत ते बोलत होते. 

या प्ररसंगी जिल्हा परिषदेच्या अध्यक्ष हर्षदा देशमुख, आमदार अमित झनक, जिल्हाधिकारी राहुल द्विवेदी, जिल्हा परिषदेचे उपाध्यक्ष चंद्रकांत ठाकरे, जिल्हा परिषदेच्या कृषी व पशुसंवर्धन समितीचे सभापती विश्वनाथ सानप यांच्यासह संबंधित विभागाचे अधिकारी उपस्थित होते. खरीप हंगामाच्या अनुषंगाने करण्यात आलेल्या तयारीविषयी माहितीचे जिल्हा अधीक्षक कृषी अधिकारी दत्तात्रय गावसाने यांनी या वेळी सादरीकरण केले.

श्री. राठोड म्हणाले, खरीप हंगामात पेरणीसाठी पुरेशा प्रमाणात बियाणे व खते उपलब्ध होण्यासाठी परिपूर्ण नियोजन करावे. तसेच या दरम्यान बोगस बियाणे, खते विक्रीस येण्याची शक्यता असते. त्यामुळे बोगस बियाणे, खते विक्रेत्यांवर कारवाई करावी. खरीप हंगामापूर्वी शेतकऱ्यांना मशागत व पेरणीसाठी पैसा उपलब्ध होण्याच्या दृष्टीने सर्व बँकांनी पीककर्ज वाटपाला गती देण्याची आवश्यकता आहे. याकरिता जिल्हा प्रशासन तसेच जिल्हा अग्रणी बँकेने पुढाकार घेऊन सर्व बँक व्यवस्थापकांची विशेष बैठक घेऊन कर्ज वाटपाचे उद्दिष्ट पूर्ण करण्यासाठी प्रयत्न करावेत. तसेच मागेल त्याला शेततळे योजना, फळबाग लागवड योजना, कृषिपंप वीज जोडणीच्या कामाला गती देण्याच्या सूचनाही पालकमंत्र्यांनी या वेळी दिल्या.

फळबाग लागवडीच्या माध्यमातून कमी पाण्यामध्ये व कमी खर्चामध्ये जास्त उत्पन्न घेता येणे शक्य आहे. त्यामुळे जिल्ह्यातील शेतकऱ्यांना फळबाग लागवडीकडे वळविण्यासाठी कृषी विभागाने प्रयत्न करणे गरजेचे आहे. यावर्षी महात्मा गांधी राष्ट्रीय ग्रामीण रोजगार हमी योजनेतून जिल्ह्यातील फळबाग लागवडीचे प्रमाण वाढविण्यासाठी विशेष प्रयत्न करण्याच्या सूचना राठोड यांनी या वेळी दिल्या.

तसेच या कामामध्ये कोणत्याही प्रकारची दिरंगाई होऊन शेतकऱ्यांचे नुकसान होणारी नाही, याची दक्षता घ्या. तसेच कामात दिरंगाई करणाऱ्या अधिकारी, कर्मचाऱ्यांवर कारवाई करण्याचे निर्देशही त्यांनी दिले.