सांगली जिल्ह्यात ६० टक्के क्षेत्रावरील हळद लागवड पूर्ण

संग्रहित छायाचित्र
संग्रहित छायाचित्र

सांगली  ः जिल्ह्यात हळद लागवड अक्षय तृतीयाच्या मुहूर्तावर सुरू झाली. आज अखेर जिल्ह्यात सुमारे ६० टक्के क्षेत्रावर लागवड झाली असून, उर्वरित ४० टक्‍के क्षेत्रावरील लागवड पंधरा दिवसांत पूर्ण होण्याची शक्‍यता आहे.  

जिल्ह्यातील हळद उत्पादक शेतकरी अक्षय तृतीयाच्या मुहूर्तावर हळद लागवडीस प्रारंभ करतात. जिल्ह्यात गेल्या वर्षी सुमारे एक हजार हेक्‍टरवर हळदीची लागवड करण्यात आली होती. यंदा मात्र वीज खंडित होत असल्याने उशिरा हळद लागवड करण्यास शेतकऱ्यांनी पसंती दिली आहे. ज्या शेतकऱ्यांच्याकडे पाणी उपलब्ध आहे, अशा शेतकऱ्यांनी हळद लागवड केली आहे. गतवर्षीपेक्षा यंदा हळदीच्या क्षेत्रात वाढ होण्याची शक्‍यता हळद संशोधन विभागाच्या सूत्रांनी वर्तविली आहे.

सांगली जिल्ह्यात वाळवा, पलूस, मिरज तालुक्‍यांत प्रामुख्याने हळदीचे मोठे क्षेत्र आहे. गतवर्षी जिल्ह्यात सुमारे १ हजार हेक्‍टर क्षेत्रावर हळदीची लागवड केली होती. यंदा हळदीच्या क्षेत्रात अंदाजे ८०० हेक्‍टरने वाढ होण्याची शक्‍यता कसबे डिग्रज येथील हळद संशोधन विभागाच्या सूत्रांनी व्यक्त केली आहे. 

वास्तविक पाहता गेल्या चार ते पाच वर्षांपासून हळदीचे दर स्थिर आहेत. यंदा देशात हळदीच्या उत्पादनात घट झाली असल्याने हळदीचे दर वाढण्याची शक्‍यता असल्याची चर्चा शेतकऱ्यांच्यात सुरू आहे. 

वाळवा, मिरज पश्‍चिम भाग आणि पलूस या भागात पाणी उपलब्ध असल्याने या भागातील शेतकऱ्यांनी हळद लागवड केली आहे. सुमारे ६० टक्के क्षेत्रावर लागवड झाली आहे. गेल्या तीन ते चार दिवसांपासून जिल्ह्यात वळीव पाऊस झाल्याने शेतकऱ्यांच्यात समाधानाचे वातावरण निर्माण झाले आहे. या पावसावर उर्वरित शेतकरी हळद लागवडीसाठी पुढे आले आहेत. प्रामुख्याने वाळवा, पलूस, मिरज तालुक्‍यात हळद लागवड मोठ्या प्रमाणात होते. 

गेल्या तीन ते चार दिवसांपूर्वी झालेला वळीव पाऊस हा हळद पिकास उपयुक्त ठरणार आहे. अगोदर लागवड केलेली हळद वाढीच्या मार्गावर आहे. सकाळी थंड वातावरण आणि दुपारी उष्णता यामुळे हळदीची वाढ चांगली होण्यास मदत होईल. - डॉ. एम. डी. माळी,  प्रभारी अधिकारी हळद संशोधन योजना, कसबे डिग्रज.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com