सटाणा, नामपूर बाजार समितीत ५५ हजार नवमतदारांची भर

सटाणा, नामपूर बाजार समितीत ५५ हजार नवमतदारांची भर

नाशिक  : सटाणा, नामपूर कृषी उत्पन्न बाजार समिती निवडणुकीसाठी १० गुंठे जमीन असलेल्या शेतकऱ्यांची मतदार म्हणून नोंदणी करण्याचे आदेश दिल्यानंतर १० गुंठे जमीन असलेल्या शेतकऱ्यांचा शोध घेऊन मंगळवारी (ता.३) अखेर दोन्ही बाजार समित्यांची अंतिम मतदार यादी प्रसिद्ध करण्यात आली. त्यानुसार १ लाख १३ हजार २४ मतदारांची नोंद करण्यात आली असून, यात गेल्यावेळच्या तुलनेत दोन्ही बाजार समित्यांमध्ये सरासरी ५५ हजार नवमतदारांची भर पडली आहे. 

शुक्रवार (ता.१३) ते सोमवार (ता.२३) दरम्यान निवडणुकीचा कार्यक्रम घोषित करण्यात येणार असल्याचे तहसीलदार गणेश राठोड यांनी सांगितले. राज्य सरकारने सहकार प्राधिकरणाच्या माध्यमातून बाजार समित्यांच्या निवडणुकीसाठी नवीन कायदा तयार केला असून, त्यानुसारच आगामी निवडणुका होणार आहेत. त्यानुसार प्रथमच नामपूर आणि सटाणा बाजार समितीसाठी निवडणुका होत आहेत. त्यामुळे शेतकऱ्याला मतदानाचा अधिकार मिळाला असून निवडणूकही लढवता येणार आहे. या निवडणुकीसाठी बाजार समितीच्या कार्यक्षेत्रात वास्तव्यास आणि दहा गुंठ्यांहून अधिक जागा ताब्यात असलेल्यांना मतदानाचा अधिकार बहाल करण्यात आला आहे.

दरम्यान, अनेक शेतकऱ्यांच्या सातबारा उताऱ्यावर सामायिक नावे असल्याने नेमका मतदार कोण, असा प्रश्न निर्माण झाल्याने व त्याबाबत सहकार आयुक्तांनी समाधानकारक मार्गदर्शन न केल्याने बाजार समित्यांची यादी आहे त्या माहितीच्या आधारे तयार करण्यात आली. मात्र, या यादीवर हरकतींचा पाऊस पडल्याने जिल्हाधिकाऱ्यांनी सातबारा उताऱ्यावरील क्षेत्र व त्यावर असलेल्या नावाच्या आधारे दहा गुंठे जमीन ज्याच्या ताब्यात असेल त्याला मतदार म्हणून नोंद करण्याच्या सूचना दिल्या. त्यानुसार युद्धपातळीवर काम सुरू करण्यात आले. 

यासंदर्भात मुंबईत महाधिवक्‍त्यांकडे झालेल्या बैठकीत दहा गुंठे जमिनीचा निकष आणि तीन वर्षांत संबंधित मतदाराने बाजार समितीत शेतमाल विक्री करणे आदी विषयांवर एकमत झाले. त्यामुळे बाजार समितीचा हा नाशिक पॅटर्न संपूर्ण राज्यात लागू करण्यात आला आहे.

सटाणा बाजार समितीसाठी सिद्धार्थ भंडारे यांची निवडणूक निर्णय अधिकारीपदी नियुक्ती करण्यात आली असून नामपूर बाजार समितीसाठी प्रांत ए. आर. विघ्ने यांची निवडणूक निर्णय अधिकारी म्हणून नियुक्ती झाली आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com