साताऱ्यात तूर, हरभरा खरेदीला अल्प प्रतिसाद

सातारा : शासनाने फलटण, कोरेगाव येथे हमीभावाने तूर व हरभरा खरेदीसाठी केंद्र सुरू केले आहे. मात्र, या केंद्रास शेतकऱ्यांकडून अल्प प्रतिसाद मिळाला आहे. तुरीची नाममात्र खरेदी झाली असून, हरभरा विक्रीची नोंदणीदेखील कमी प्रमाणात झाली आहे. 

जिल्ह्यात सोयाबीन पिकासाठी हमीभावाने खरेदी केंद्रे सुरू केली होती. सोयाबीन काढणी सुरू असताना व्यापाऱ्यांनी सोयाबीनचे दर पाडल्यामुळे ही हमीभाव केंद्रे शेतकऱ्यांसाठी फायदेशीर ठरली होती. या विभागाकडून पाच फेब्रुवारीस फलटण येथे तूर खरेदी केंद्र सुरू करण्यात आले आहे. मात्र, आजपर्यंत या केंद्रावर अवघी २५२ क्विंटल तूर खरेदीसाठी आलेली आहे. सध्या नोंदणीसही शेतकऱ्यांकडून कमी प्रतिसाद मिळत आहे.

जिल्ह्यात तुरीचे क्षेत्र कमी असल्याने आवक कमी होत असल्याचा अंदाज व्यक्त केला जात आहे. या केंद्रावर तुरीला क्विंटलला ५४५० रुपये दर दिला आहे. हरभऱ्यासाठी फलटण व कोरेगाव येथे खरेदी केंद्रे सुरू केली असून, नोंदणीची कामे सुरू झाली आहेत. मात्र, आज अखेर कोरेगाव केंद्रावर पाच तर फलटण केंद्रावर २० शेतकऱ्यांनी नोंदणी केली आहे. जिल्ह्यात हरभऱ्यांच्या क्षेत्राच्या तुलनेत ही नोंदणी फारच अल्प आहे. हरभऱ्यांची प्रत्यक्ष खरेदी (ता.२) पासून केली जाणार आहे. खरेदी केंद्रावर हरभऱ्यास ४४०० रुपये क्विंटलप्रमाणे दर दिला जाणार आहे.