'वनामकृवि' कुलगुरू निवडीसाठी शोध समिती

परभणी : वसंतराव नाईक मराठवाडा कृषी विद्यापीठाचे कुलगुरू डाॅ. बी. व्यंकटेश्वरलू यांचा कार्यकाळ येत्या ३१ मे रोजी संपत आहे. त्यामुळे नवीन कुलगुरूंची निवड करण्याची प्रक्रिया सुरू झाली आहे. राज्यपाल तथा कृषी विद्यापीठांचे कुलपती सी. विद्यासागर राव यांनी मुंबई उच्च न्यायालयाच्या निवृत्त मुख्य न्यायाधीश न्यायमूर्ती मंजुळा चेल्लूर या अध्यक्ष असलेली त्रिस्तरीय शोध समिती स्थापन केली आहे.

कुलगुरू पदांसाठी इच्छुक उमेदवारांना नोडल अधिकारी डाॅ. पी. जी. पाटील यांच्याकडे १६ एप्रिलपर्यंत अर्ज पाठविता येणार आहेत. डाॅ. बी. व्यंकटेश्वरलू यांचा कार्यकाळ ३१ मे २०१८ रोजी संपत आहे. त्यामुळे कृषी विद्यापीठांचे कुलपती सी. विद्यासागर राव यांनी कृषी विद्यापीठाच्या कुलगुरू पदासाठी कृषी शास्त्रज्ञ, विद्याव्यासंगी, विद्यापीठास शिक्षण, संशोधन आणि विस्तार शिक्षणाचे अत्युच्च केंद्र बनविण्यासाठी क्षमता असलेल्या तसेच मराठवाडा विभागातील कृषीविषयक संशोधनाच्या गरजा पूर्ण करण्याची क्षमता असलेल्या व्यक्तीची शिफारस करण्याकरिता त्रिस्तरीय शोध समिती स्थापन केली आहे.

मुंबई उच्च न्यायालयाच्या निवृत्त मुख्य न्यायमूर्ती मंजुळा चेल्लूर या शोध समितीच्या अध्यक्ष आहेत. भारतीय कृषी संशोधन परिषदेचे महानिदेशक डाॅ. डाॅ. त्रिलोचन महापात्र आणि कृषी व पणन विभागाचे अतिरिक्त सचिव विजय कुमार हे शोध समितीचे सदस्य आहेत. शोध समितीने केंद्रिय कापूस तंत्रज्ञान संशोधन संस्थेचे संचालक डाॅ. पी. जी. पाटील यांची नोडल अधिकारी म्हणून नियुक्ती केली आहे.

कुलगुरू पदासांठी विहित केलेली अर्हता आणि अनुभव आदीची माहिती विद्यापीठाच्या संकेतस्थळावर उपलब्ध करून देण्यात आली आहे. व्यक्ती तसेच अर्हताप्राप्त योग्य उमेदवारांचे नामनिर्देशन संस्थादेखील करू शकतात. इच्छुक उमेदवारांना १६ एप्रिलपर्यंत नोडल अधिकारी डाॅ. पी. जी. पाटील यांच्याकडे अर्ज पाठविता येणार आहेत. शोध समितीला आवश्यकता भासल्यास निवडयोग्य उमेदवारांना त्यांच्याबरोबर वैयक्तिक पातळीवर विचार विनिमय करण्यासाठी आमंत्रित करण्यात येईल.