पावसाळीपाठोपाठ हिवाळी अधिवेशनही नागपुरात?

नागपूर (प्रतिनिधी) : पावसाळी अधिवेशन नागपुरात होणार असल्याचे स्पष्ट झाले असताना हिवाळी अधिवेशनही येथेच होण्याची चिन्हे आहेत. 

विदर्भ महाराष्ट्रात सामील करताना झालेल्या कराराप्रमाणे एक अधिवेशन म्हणजे हिवाळी अधिवेशन नागपुरात घेण्यात येते. महाराष्ट्राच्या निर्मितीनंतर जवळपास प्रत्येक हिवाळी अधिवेशन नागपुरात झाले आहे. विदर्भावर होत असलेल्या अन्यायामुळे अर्थसंकल्पीय अधिवेशन नागपुरात घेण्याची मागणी अनेकदा विदर्भातील नेत्यांकडून विशेष करून विरोधात असताना भाजपच्या नेत्यांनी केली आहे. पावसाळी अधिवेशन नागपुरात घेण्याचे हिवाळी अधिवेशनादरम्यान सरकारकडून जाहीर करण्यात आले होते. सरकारने जवळपास पावसाळी अधिवेशन नागपुरात घेण्याचे निश्‍चित केले असून बांधकाम विभागाला तशा सूचनाही देण्यात आल्या आहेत. 

4 जुलैपासून पावसाळी अधिवेशन सुरू होणार आहे. पावसाळीपाठोपाठ हिवाळी अधिवेशनही नागपुरात होण्याची शक्‍यता वर्तविण्यात येत आहे. मुंबईतील आमदारांचे निवास असलेली "मनोरा'' इमारत धोकादायक दर्शविण्यात आली असून ती तोडण्यात येणार आहे. सूत्रांकडून मिळालेल्या माहितीनुसार, मनोरा पाडण्यात येणार असून त्या जागी नवीन भव्य इमारत बांधण्यात येणार आहे. लवकरत इमारत पाडण्यात येणार असल्याची माहिती सांगण्यात येते. 

मुंबईतील मनोरा पाडल्यास आमदारांच्या मुक्कामाचा प्रश्‍न निर्माण होईल. त्यामुळे आमदारांकडून राहण्यासाठी एक लाख रुपयाची मागणी होत आहे. विधानसभा आणि विधान परिषदेचे आमदार धरता दोन कोटींच्या वर महिन्याला खर्च येईल. शासनाची आर्थिक परिस्थिती आधीच बिकट आहे. त्यामुळे पर्याय म्हणून हिवाळी अधिवेशनही नागपुरात घेण्याचा विचार सरकार पातळीवर सुरू असल्याचे समजते. 

सत्ताधारी भाजप याच्या माध्यमातून एकाच दगडात दोन पक्षी मारण्याच्या प्रयत्नात असल्याचेही जाणकार सांगतात. यामुळे विदर्भाच्या विकासाबाबत सरकार गंभीर असल्याचे दाखविण्याचा प्रयत्न करणार असल्याचे सांगण्यात येते.