नव्या दमाने स्वत: काम करणार : महिला सरपंचांचा आत्मविश्‍वास

आळंदी, जि. पुणे ः नवे करण्याची जिद्द आहे. लोकांच्या पाठिंब्याची गरज आहे. थेट जनतेतून निवडून आल्याने नव्या दमाने काम करणार आहे, असा आत्मविश्‍वास महिला सरपंचांनी येथे व्यक्त केला.

ॲग्रोवन सरपंच महापरिषदेत सुमारे पाचशे महिला सरपंचांनी सहभाग घेतला आहे. कोल्हापूर जिल्ह्यातील शिरोळ या समृद्ध तालुक्‍यातून उमळवाडच्या सरपंच सरिता भवरे, शिरदवाडच्या सरपंच अक्षदा कांबळे, नवे दानवाडच्या सरपंच वंदना कांबळे यांनी सरपंच परिषदेत सहभागी झाल्या आहेत. यापैकी उमळवाडच्या सरपंच सुचित्रा खवरे या शेतकरी चळवळीतून आलेल्या कार्यकर्त्या. त्यांना राजकीय कारकीर्द घडवायची आहे, या जिद्दीने त्या सरपंच पदासाठी उभ्या राहिल्या आणि निवडून आल्या. पुरुषच ग्रामपंचायत चालवतात याबद्दल तुमचे काय मत आहे, हे विचारताच सौ. खवरे यांनी आमच्या बाबतीत हे खरे नसल्याचे सांगितले. बहुतांशी ठिकाणी अशी परिस्थिती असली तरी आम्ही मात्र स्वतंत्रच निर्णय घेत असल्याचे त्यांनी उत्साहाने सांगितले.

नव्या गोष्टी शिकण्यासाठी आम्ही येथे आलो. ग्रामविकासासाठी अशा प्रकारच्या परिषदा आम्हा नव्या महिला सरपंचाना दिशादर्शक ठरतील, असे मत अक्षदा कांबळे, वंदना कांबळे यांनी व्यक्त केले. शोसनाकडून येणाऱ्या नियमांचा आम्ही स्वत: अभ्यास करत असल्याची प्रतिक्रिया त्यांनी दिली.

नव्या नियमानुसार जनतेतून थेट सरपंच निवडून आल्यानंतर किमान अडीच वर्षे तरी त्याच्यावर अविश्‍वास ठराव आणता येणार नाही असा नियम आहे. या नियमाचा अनेकींना विकासकामे करताना फायदा हाईल, अशी प्रतिक्रिया अनेक महिला सरपंचानी दिल्या. जरी एखादे काम लोकहितासाठी असले आणि त्याला विरोध झाला, तर तातडीने अविश्‍वास ठराव आणून सत्तेवरून बाजूला करण्याच्या वृत्तीला हा नियम म्हणजे लगाम असल्याचे महिला सरपंचांनी सांगितले. यामुळे एखादे रखडलेले काम करणे आता सहज शक्‍य होणार असल्याचे सहभागी महिला सरपंचांचे मत आहे.