मुंबई : गेल्या ४८ वर्षांत राज्यातील सिंचनाची परिस्थिती १८ टक्क्यांवर गेली नाही, मात्र पंतप्रधान नरेंद्र मोदी आणि देवेंद्र फडणवीस सरकारने ४० टक्क्यांवर सिंचन क्षेत्र नेण्याचा प्रयत्न केला आहे. तसेच कॉँग्रेस राष्ट्रवादीने टेंभूपासून ते गोसीखुर्दपर्यंत अनेक योजना अपूर्ण अवस्थेत ठेवल्या आहेत, ही कॉँग्रेसची अर्धवट स्मारके असून, ती आपण पूर्ण करणार असल्याचे केंद्रीय वाहतूकमंत्री नितीन गडकरी यांनी सांगितले.
मोदी सरकारला चार वर्षे पूर्ण झाल्यानिमित्ताने ते (ता. २९) पत्रकार परिषदेत बोलत होते. सिंचनासाठी सरकारने ५ हजार कोटी रुपयांची तरतूद केल्याचे गडकरी यांनी या वेळी सांगितले. या वेळी बोलताना त्यांनी मोदी सरकारने गेल्या चार वर्षांत केलेल्या कामांची जंत्री वाचून दाखवली. वाहतूक विभागामार्फत कोणकोणत्या रस्त्यांची कामे सुरू आहेत. याची माहिती त्यांनी दिली. मुंबई ते दिल्ली असा एक्सप्रेस हायवे तयार करण्यात येणार असून, हा रस्ता आदिवासी पट्ट्यातून जाणार आहे. त्यामुळे आदिवासींचा विकास होण्यास मदत होईल, असा विश्वास त्यांनी व्यक्त केला.
गेल्या चार वर्षांत कोट्यवधी लोकांना रोजगार उपलब्ध करून देण्यात आला असून, जास्तीत जास्त परदेशी गुंतवणूक आणण्याचा सरकारचा प्रयत्न असल्याचे त्यांनी सांगितले. त्यांनी जलवाहतुकीसंदर्भात बोलताना ७५०० किलोमीटर लांबीच्या जलवाहतुकीसाठी विविध प्रकल्प राबवण्यात येत आहेत. तसेच गंगा शुद्धीकरण प्रकल्पाचे सत्तर टक्के काम झाले असून, यापुढे गंगा नदीवर कोणत्याही नव्या वीज प्रकल्पास मान्यता देणार नसल्याचे त्यांनी सांगितले.
साडेतीन लाखांत घर देणार नागपुरात खासदार प्रकल्प म्हणून आपण गृहप्रकल्प उभारत असून, या प्रकल्पातील घर भिकाऱ्यालाही खरेदी करता यावे, असा आपला मानस आहे. त्यासाठी ४६० चौ. फुटांचे हे घर केवळ साडेतीन लाख रुपयांत उपलब्ध करून देत असून सोफासेट, वीज, एलईडी, डबलबेड, गरमपाणी या गोष्टी मोफत देणार असल्याचे आश्वासन गडकरी यांनी या वेळी दिले.
शिवसेनेशी मी चर्चा करणार नाही शिवसेनेशी झालेली युती ही हिंदुत्वाच्या मुद्द्यावर झालेली आहे. त्यामुळे युतीत विघ्न येण्याचा प्रश्न नाही, असे गडकरी यांनी स्पष्ट केले. शिवसेना आणि भाजप यांचे नाते तुझे माझे जमेना आणि तुझ्यावाचून करमेना, असे असल्याचे त्यांनी सांगितले. मात्र युतीबाबत उद्धव ठाकरेंशी आपण चर्चा करणार नाही, असे त्यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.