ऑनलाइन गाळप परवाने ऑक्टोबरपासून

पुणे : राज्यातील साखर कारखान्यांना यंदाचा गाळप हंगाम सुरू करण्यासाठी परवाने देण्याची प्रक्रिया ऑक्टोबरपासून सुरू होईल. यंदा सहकारातील किमान ८७ साखर कारखान्यांना परवाने दिले जातील, अशी माहिती सूत्रांनी दिली. 

‘राज्याचा गाळप हंगाम एक नोव्हेंबरपासून सुरू करण्याचे मंत्री समितीने ठरविल्यामुळे परवानेवाटपाची प्रक्रिया ऑक्टोबरच्या पहिल्या आठवड्यापासून सुरू होऊ शकते. परवान्यासाठी अत्यावश्यक ठरविलेली सर्व माहिती साखर कारखान्यांकडून संगणकीय प्रणालीत भरली गेली आहे.

त्यासाठी आम्ही ३० सप्टेंबरची मुदत कारखान्यांना दिली आहे. त्यामुळे ही मुदत संपताच परवानेवाटप सुरू होईल,’ असे सहकार विभागातून सांगण्यात आले.  सहकारातील ८७ आणि खासगी क्षेत्रातील ८३ साखर कारखाने यंदा ऑनलाइन परवाना मिळण्यासाठी तयारी करीत आहेत.

गेल्या हंगामात सहकारातील ८८ कारखान्यांनी परवाना घेतला होता. म्हणजेच राज्याची सहकारी साखर कारखानदारी आता स्थिरावल्याचे चित्र दिसत आहे. याउलट खासगी कारखान्यांचा विचार करता २०१५-१६ च्या हंगामात ७८, २०१६-१७ मध्ये ६२ आणि आता ८३ साखर कारखाने परवाना घेण्याची तयारी करीत आहेत. 

‘राज्यात खासगी साखर कारखानदारी सहकारी कारखान्यांना तोडीस तोड म्हणून उतरली आहे. आमच्या दृष्टीने आता सहकारी आणि खासगी कारखाने समान संख्येत दिसत असल्यामुळे साखर उद्योगात सहकार यशस्वी ठरतो की खासगी व्यवस्था आदर्श ठरेल, याचा निवाडा पुढील काही वर्षांत होईल.

सहकारातील नेते आणि काही कारखानदारांनीच खासगी पातळीवर साखर कारखाने चालविण्यास घेतल्यामुळे सहकारी व्यवस्थेला खासगी कारखाने चालविता येतात काय हेदेखील स्पष्ट होईल,’ असे सूत्रांचे म्हणणे आहे.  गेल्या हंगामात ३७३ लाख टन ऊस राज्यात होता. त्यातील १०३ लाख टन ऊस खासगी कारखान्यांच्या वाट्याला आला होता. चालू हंगामासाठी ६५० लाख टन ऊस उपलब्ध होण्याची शक्यता आहे.

त्यातील किती ऊस स्वतःकडे आणण्याचा प्रयत्न सहकारी साखर कारखाने करतात यावर सहकारी साखर उद्योगाचे भवितव्य ठरणार आहे.  राज्यातील ८८ सहकारी साखर कारखान्यांनी गेल्या हंगामात २६८ लाख टन उसाचे गाळप करून ३० लाख ६८ हजार क्विंटल साखर तयार केली होती. सहकारी साखर कारखान्यांचा एकूण सरासरी साखर उतारा ११.४१ टक्के, तर खासगी कारखान्यांचा उतारा १०.८० टक्क्यांच्या आसपास होता.