जेसीबी, पाेकलेनसाठी दहा हजार अर्ज

पुणे : जलयुक्त शिवार अभियानांतर्गत जल व मृद संधारणाच्या कामांसाठी जेसीबी आणि पाेकलेन (अर्थमूव्हर्स) यंत्रसामग्री व्याज अर्थसाह्य याेजनेत राज्यभरातून सुमारे १० हजार अर्ज दाखल झाले असून, यामधून केवळ एक हजार लाभार्थी निवड करण्यात येणार आहे. एक हजार लाभार्थी निवडीसाठी १० हजार अर्ज दाखल झाल्याने लाभार्थी निवडीसाठी सरकारची कसरत हाेणार आहे. सर्वाधिक ८७० अर्ज नगर, तर सर्वांत कमी ३ अर्ज मुंबईतून दाखल झाले आहेत.  

सुशिक्षित बेराेजगार तरुण, बेराेजगारांची सहकारी संस्था, नाेंदणीकृत शेतकरी गट, शेतकरी उत्पादक कंपनी, विविध कार्यकारी साेसायट्यांना ही याेजना लागू करण्यात आली आहे. यामध्ये १७ लाख ६० हजार रुपयांची कमाल मर्यादा ठेवण्यात अाली असून, या याेजनेसाठी शासन पाच वर्षांचे व्याज भरणार असून, त्याची कमाल मर्यादा ५ लाख ९० हजार रुपये एवढी असणार आहेत.  पात्र लाभार्थ्यास वित्तीय संस्थांकडून कर्ज देण्यात येणार असून, याची कमाल मर्यादा १७ लाख ६० हजार रुपये असणार असून, शासनाच्या वतीने सरळ व्याज पद्धतीने १२ टक्के दराने व्याज पाच वर्षे देण्यात येणार आहे. 

दरम्यान याेजनेची मुदत संपल्यानंतर झाेपतून जागे झालेल्या लाेकप्रतिनिधींनी आपल्या बगलबच्च्यांना या याेजनेत घुसविण्यासाठी थेट मुख्यमंत्र्यांना साकडे घातले असल्याचे समजते. तर मुख्यमंत्र्यांनी पहिल्या टप्प्यातील लाभार्थी निवड पारदर्शी व्हावी, पुढील टप्प्यात बघू असे सांगत. मार्चअखेर जिल्हा पातळीवर जेसीबी पाेकलेन वाटपाचे कार्यक्रम घेण्याचे आदेश संबधित विभागाला दिले असल्याचे सूत्रांनी सांगितले. 

लाभार्थी निवडीसाठी अटी व नियम जारी जलसमृद्धी (अर्थमूव्हर्स) यंत्रसामुग्री व्याज अर्थसाह्य सवलत याेजनेअंतर्गत वाटप करण्यात येणाऱ्या १ हजार जेसीबी पाेकलेनेसाठी सुमारे १० हजार अर्ज प्राप्त झाल्यानंतर लाभार्थी निवड पारदर्शी व्हावी, यासाठी शासनाने अटी व नियम जारी केले आहेत. यामध्ये लाभार्थ्याने विनाअट कर्ज मंजुरीचे पत्र आॅनलाईन प्रणालीमध्ये २३ मार्चपर्यंत अपलाेट करण्याची प्रमुख अट टाकण्यात आली आहे. या अटीमध्ये देखील एक हजारपेक्षा जास्त लाभार्थी पात्र झाल्यानंतर साेडत काढण्यात येणार असल्याचेही स्पष्ट करण्यात आले आहे.