जोतिबा यात्रेचा आज मुख्य दिवस

कोल्हापूर : वाडी रत्नागिरी (जि. कोल्हापूर) येथील जोतिबा यात्रेचा आज (शनिवार) मुख्य दिवस आहे. जोतिबाचा डोंगर यात्रेसाठी सज्ज झाला आहे. डोंगरावर मोठ्या संख्येने भाविक दाखल होत आहेत. यात्रा सुरक्षित पार पाडण्यासाठी जिल्हा प्रशासन, पोलिस प्रशासन आणि पश्चिम महाराष्ट्र देवस्थान समितीने जय्यत तयारी केली आहे.  

यात्रा काळात येणाऱ्या भाविकांसाठी सामाजिक सेवा संस्थांच्या वतीने ठिकठिकाणी मोफत अन्नछत्राचे आयोजन केले असून, चार दिवस अन्नछत्र सुरू राहणार आहे. कामदा एकादशीच्या मुहूर्तावर पारंपरिक पद्धतीने चैत्र यात्रेला मंगळवारपासून (ता.२७) पासून सुरवात झाली. रविवारची (ता.१) पाकळणी झाल्यानंतर यात्रेची सांगता होईल. देशभरातून भाविक दाखल होत आहेत. विविध ठिकाणांहून मानाच्या सासनकाट्या दाखल झाल्या आहेत. दुपारी विविध मंत्र्यांच्या हस्ते पूजन होईल. सायंकाळी सासनकाट्यांची मिरवणूक निघेल.

जिल्हा पोलिस प्रशासनाने कडेकोट बंदोबस्तासाठी १८ ठिकाणी सीसीटीव्ही कॅमेर बसवले आहेत. आरोग्य यंत्रणा, सार्वजनिक प्रवासी वाहतूक, व्हाइट आर्मीचे रेस्क्यू पथक, पश्चिम महाराष्ट्र देवस्थान समिती आणि जिल्हा प्रशासनाने यात्रा सुरळीत पार पाडण्यासाठी जय्यत तयारी केली आहे. यात्रा काळात येणाऱ्या भाविकांसाठी सहजसेवा ट्रस्ट, आर. के. मेहता ट्रस्ट आणि शिवाजी चौक तरुण मंडळाच्या वतीने मोफत अन्नछत्राचे आयोजन केले आहे. मंदिरात प्रवेश करणाऱ्या सासनकाठ्यामुळे गर्दी होत असल्याचा अनुभव लक्षात घेऊन या वर्षी मानाच्या सासनकाठ्यांना दक्षिणद्वारातून प्रवेश दिला जाणार आहे.