नांदेड, परभणी, हिंगोलीत सव्वातीन लाख क्विंटल तूर खरेदी

नांदेड  ः मराठवाड्यातील नांदेड, परभणी, हिंगोली या तीन जिल्ह्या़ंत सोमवार (ता. १४)पर्यंत २७ हजार ९६८ शेतकऱ्यांची ३ लाख २२ हजार ५२४ क्विंटल तूर खरेदी करण्यात आली आहे. मंगळवारी (ता. १५) तूर खरेदीसाठी अंतिम मुदत आहे. अजून या तीन जिल्ह्यांतील नोंदणी केलेल्या ३४ हजार १४४ शेतकऱ्यांची तूर खरेदी बाकी आहे.

खरेदीसाठी आणखीन मुदतवाढ दिली तरी खरेदीची गती अशीच राहिल्यास उर्वरित शेतकऱ्यांची तूर खरेदी करण्यासाठी दोन महिन्यांपेक्षा जास्त कालावधी लागू शकतो. या जिल्ह्यांमध्ये २ हजार ९४० शेतकऱ्यांचा ४५ हजार ८६६ क्विंटल हरभरा खरेदी करण्यात आला आहे. तीन जिल्ह्यांतील शेतकऱ्यांचे तुरीचे ५४ कोटी ४८ लाख ६१ हजार रुपयांचे, तर हरभऱ्याचे १५ कोटी १७ लाख ४२ हजार ८०० रुपयांचे चुकारे अडकले आहेत.

नांदेड जिल्ह्यातील नाफेडच्या ९ आणि विदर्भ मार्केटिंग फेडरेशनच्या १ अशा १० खरेदी केंद्रांवर तुरीसाठी २८ हजार १७० शेतकऱ्यांनी नोंदणी केलेली आहे. यापैकी १६ हजार ८९४ शेतकऱ्यांची १ लाख ६९ हजार ६०५ क्विंटल तूर खरेदी करण्यात आली अजून ११ हजार २७६ शेतकऱ्यांच्या तुरीची खरेदी बाकी आहे. परभणी जिल्ह्यातील नाफेडच्या ७ आणि विदर्भ मार्केटिंग फेडरेशनच्या १ अशा ८ केंद्रांवर नोंदणी केलेल्या २० हजार २८२ शेतकऱ्यांपैकी ५ हजार ८१ शेतकऱ्यांची ५ हजार ८१ क्विंटल तूर खरेदी करण्यात आली असून, अद्याप १५ हजार २०१ शेतकऱ्यांची तूर शिल्लक आहे.

हिंगोली जिल्ह्यातील नाफेडच्या ५ खरेदी केंद्रावर नोंदणी केलेल्या १३ हजार ७२६ पैकी ६ हजार ५९ शेतकऱ्यांची तूर खरेदी करण्यात आली असून, अद्याप ७ हजार ६६७ शेतकऱ्यांच्या तुरीची खरेदी बाकी आहे. साठविण्यासाठी गोदाम नसल्यामुळे १ लाख ६६४ क्विंटल तूर खरेदी केंद्रांवर पडून आहे. त्यामुळे शेतकऱ्यांचे ५४ कोटी ४८ लाख ६१ हजार रुपयाचे चुकारे रखडले आहेत. 

सध्या अनेक ठिकाणी खरेदी केलेला शेतीमाल साठविण्यासाठी गोदामे नाहीत. अनेक ठिकाणी चाळण्या, वजनकाट्यांची संख्या कमी असून, बारदाना कमी पडत आहे. त्यामुळे खरेदी बंद राहत आहे. मंगळवारी (ता. १५) तूर खरेदी बंद होणार असल्यामुळे उर्वरित शेतकऱ्यांच्या तुरीचा प्रश्न कायम राहणार आहे.