'उजनी'ची पाणीपातळी ३२ टक्क्यांवर

सोलापूर  ः वाढते ऊन आणि पाण्याचा उपसा या दोन्हींमुळे सोलापूरची वरदायिनी असलेल्या उजनी धरणातील पाणीपातळीत झपाट्याने घट होत आहे. जानेवारी महिन्यात ९९ टक्‍क्‍यांपर्यंत असलेली पाणीपातळी अवघ्या तीन महिन्यांतच निम्म्याहून अधिक प्रमाणात घटली आहे. सोमवारी (ता. ९) दुपारी धरणातील पाणीपातळी ३२.७७ टक्‍क्‍यांवर पोचली होती. त्यामुळे येत्या काही दिवसांत सोलापूर जिल्ह्याला उन्हाच्या चटक्‍यांबरोबर टंचाईच्याही झळांना तोंड देण्याची वेळ येणार आहे. सोलापूर जिल्ह्यासाठी उजनी धरणाचे स्थान महत्त्वाचे आहे. विशेषतः पंढरपूर, माळशिरस, माढा, करमाळा, मोहोळ आणि मंगळवेढ्याचा काही भाग या पाण्यावरच अवलंबून आहे. या धरणातून सोलापूर शहरासह जवळपास १२० हून अधिक पाणी योजनांना पुरवठा होतो. शिवाय आठमाही योजनेमुळे रब्बी, खरीप आणि आता उन्हाळी हंगामातही शेतीला धरणातून पाणी पुरवले जाते. 

गेल्याच महिन्यात २४ मार्चला शेतीसाठी उन्हाळी हंगामातील पहिली पाळी सोडण्यात आली आहे. सुमारे १५ हजार क्‍युसेक इतके पाणी त्यासाठी सोडले आहे. नियोजनानुसार आणखी एक पाळी सोडण्यात येणार आहे. पण पाण्याची सध्याची स्थिती पाहता, या एका पाळीवरच नियोजन संपवले जाण्याची शक्‍यता आहे. दरम्यान, गेल्या आठवड्यात ३८ टक्‍क्‍यांवर असलेली पाणीपातळी या दोन-तीन दिवसांत वेगाने घटली आहे. 

सोमवारी (ता. ९) धरणामध्ये एकूण पाणीपातळी ४९३.२९५ मीटर होती. तसेच २२९९.९४ दलघमी (८१.२२ टीएमसी) इतका एकूण साठा होता. त्यापैकी ४९७.१३ दलघमी (१७.५६ टीएमसी) इतका उपयुक्त साठा होता. तर पाण्याची टक्केवारी ३२.७७ टक्के इतकी होती. सध्या उनाची तीव्रता वाढली आहे. गेल्या दोन आठवड्यांपासून ४० अंश सेल्सियसच्या पुढे तापमानाचा पारा चढला आहे. येत्या काही दिवसांत ही तीव्रता जसजशी वाढेल, तशी पाणीपातळीत आणखी घट होण्याची आणि टंचाईच्या झळा तीव्र होण्याची चिन्हे आहेत.