कोल्हापुरात ओला वाटाणा दहा किलोस ४०० ते ५०० रुपये

कोल्हापूर: येथील बाजार समितीत या सप्ताहात ओला वाटाण्याच्या दरात तेजी राहिली. ओल्या वाटाण्यास दहा किलोस ४०० ते ५०० रुपये दर मिळाला. ओल्या वाटाण्याच्या आवकेत घट झाली. दररोज पंधरा ते वीस पोती वटाण्याची आवक झाल्याची माहिती बाजार समितीच्या सूत्रांनी दिली.  हिरव्या मिरचीची दररोज चारशे ते पाचशे पोती आवक होती. हिरव्या मिरचीस दहा किलोस ७० ते १६० रुपये दर मिळाला. ढोबळी मिरचीची दररोज चारशे ते पाचशे पोती आवक झाली. ढोबळी मिरचीस दहा किलोस ५० ते १६० रुपये दर मिळाला. गवारीच्या आवकेत यंदाच्या सप्ताहात काहीशी सुधारणा दिसून आली. गवारीची दररोज चाळीस ते पन्नास पोती आवक झाली. गवारीस दहा किलोस १०० ते २०० रुपये दर मिळाला. कारलीची पस्तीस ते चाळीस पाट्या आवक झाली. कारल्यास दहा किलोस १०० ते २०० रुपये दर होता. भेंडीस १०० ते १२५ करंड्या आवक झाली. भेंडीस दहा किलोस २०० ते ३०० रुपये दर होता. काकडीची पन्नास ते शंभर करंड्या आवक होती. काकडीस दहा किलोस ३० ते ८० रुपये दर मिळाला.  फ्लॉवरची दररोज ३७६ पोती आवक होती. फ्लॅवरला दहा किलोस १५० ते ३०० रुपये दर होता. पालेभाज्यांमध्ये कोथिंबिरीची सात ते आठ हजार पेंढ्या आवक होती. कोथिंबिरीस शेकडा ७०० ते १४०० रुपये दर होता. गेल्या सप्ताहाच्या तुलनेत कोथिंबिरीच्या आवकेत पंधरा ते वीस टक्क्‍यांनी घट झाल्याचे बाजार समितीच्या सूत्रांनी सांगितले. मेथीची सहा ते सात हजार पेंढ्या आवक हाती. मेथीस शेकडा २०० ते ८०० रुपये दर होता. पालक, पोकळा शेपूस २०० ते ४०० रुपये दर मिळाला. कांद्याची सात ते आठ हजार क्विंटल आवक झाली. कांद्यास दहा किलोस ५० ते २०० रुपये दर मिळाला. गेल्या सप्ताहाच्या तुलनेत कांद्याचे दर स्थिर असल्याची माहिती बाजार समितीच्या सूत्रांनी दिली.