जळगाव जिल्ह्यात जलयुक्तच्या कामांना वेग

जळगाव  ः जिल्हा परिषदेच्या लघुसिंचन विभागाकडून जलयुक्त शिवार अभियानांतर्गत कामांना गती देण्यात आली असून, तलाव दुरुस्ती व बंधारे दुरुस्तीची कामे वेगात सुरू आहेत. जेथे पाणी अडविणे लवकर शक्‍य आहेत, त्या कामांवर लक्ष केंद्रीत केले आहे. जी कामे यंदाच्या आर्थिक वर्षात केली जातील, त्यांची त्रयस्थ संस्थेकडून तपासणी करून घेण्याची तयारीही केली आहे. 

कामांचा दर्जा कसा आहे हेदेखील महत्त्वाचे असून, त्यासंबंधीची कार्यवाही आतापासून हाती घेतली आहे. काही कंत्राटदारांनी कामे मिळविण्यासाठी मंजूर निधीपेक्षा २५ ते ३० टक्के कमी दरात काम करण्याची तयारी निविदेत दाखविली. ई-निविदा प्रक्रिया असल्याने ही कामे द्यावी लागली. परंतु मंजूर निधीपेक्षा कमी दरात चांगल्या दर्जाची कामे कशी होतील, असा प्रश्‍न सदस्यांनी उपस्थित केला आहे. २२२ गावांमध्ये यंदा जलयुक्त शिवार अभियानातून विविध कामे करायची असूून, जिल्हा परिषदेचा लघुसिंचन विभाग पाझर तलाव दुरुस्ती, साठवण बंधारे, कोल्हापूर बंधारे दुरुस्ती आदी कामे करील. सुमारे ३० कोटी रुपये खर्चाची कामे लघुसिंचन विभाग करणार आहे.

मागील वित्तीय वर्षातील सुमारे २२ अपूर्ण कामेही पूर्ण करायची आहेत. ही बाब लक्षात घेता कामांना गती देण्यात आली असून, उशिराने कामे करणाऱ्या कंत्राटदारांना सक्त ताकीद अभियंत्यांनी दिली आहे. तसेच, जिल्हा परिषद सदस्यांनाही कामाच्या ठिकाणी जाऊन पाहणी, सूचना करण्याची तोंडी मंजुरी दिली असून, यामुळे कामे चांगली व गतीने होतील, असा उद्देश असल्याची माहिती मिळाली. 

त्रयस्त संस्थेकडून कामांची तपासणी करण्यासंबंधीची सूचना वरिष्ठ कार्यालयाकडून आली आहे. त्यासंबंधी पदाधिकारी मात्र अनभिज्ञ असून, तपासणी करायची की नाही याचे पूर्ण अधिकार जिल्हा परिषदेला असणार आहे. २०१६ मध्ये जिल्हा परिषदेने त्रयस्त संस्थेकडून कामांची तपासणी करून घेतली होती. त्यात अनेक कामांमध्ये तांत्रिक दोष आढळले होते. या प्रकरणी चौकशीही झाली होती आणि संबंधित ठेकेदारांची बिले रोखण्यात आली होती, अशी माहिती मिळाली.