मराठवाड्याला पिंजार-दमणगंगा खोऱ्यातून पाणी : मुख्यमंत्री

नांदेड  ः मराठवाड्याच्या वाट्याचे कृष्णा खोऱ्यातील २१ टीएमसी पाणी पश्चिम महाराष्ट्राने पळवले आहे. या २१ पैकी १४ टीएमसी पाण्याचा पत्ताच लागत नाही. आता ७ टीएमसी पाणी देण्याचे काम सुरू आहे. या २१ टीएमसी पाण्यासह आणखी ५० टीएमसी पाणी पिंजार-दमणगंगा खोऱ्यातून मराठवाडा-उत्तर महाराष्ट्रात आणणार असल्याचा दावा करत केंद्र सरकारकडून ५० हजार कोटी रुपये निधी मिळणार असल्याचे मुख्यमंत्री देवेंद्र फडणवीस यांनी गुरुवारी (ता. १९) सांगितले.

लोहा (जि. नांदेड) येथे आयोजित विकासकामांच्या ई-भूमिपूजन कार्यक्रमामध्ये ते बोलत होते. या वेळी केंद्रीय रस्ते वाहतूकमंत्री नितीन गडकरी, कामगारमंत्री संभाजी पाटील निलंगेकर, भाजपचे प्रदेशाध्यक्ष खासदार रावसाहेब दानवे, खासदार डॉ.‍ सुनील गायकवाड, आदींची प्रमुख उपस्थिती.

श्री. फडणवीस पुढे म्हणाले, सरकार रस्ते, वीज,‍ पाणी या विषयांना प्राधान्य देण्यात येत आहे. नानाजी देशमुख कृषी संजीवनी प्रकल्पांतर्गत मराठवाड्यातील चार हजार गावांमध्ये एकात्मिक शेती सुधार योजना राबविण्यात येणार आहे. यासाठी जागतिक बँकेने सहा हजार कोटी रुपये कर्ज देण्याचे मान्य केले आहे, अशीही माहिती मुख्यमंत्री यांनी दिली.

श्री. गडकरी म्हणाले, की राज्यातील राष्ट्रीय महामार्गावर १७० ब्रीज कम बंधाऱ्यांची कामे हाती घेतली आहेत. यामुळे मोठ्या प्रमाणात पाणीसाठा उपलब्ध होईल. 

सेकंड जनरेशन इथेनाॅलच्या निर्मितीला मान्यता शेतमालाच्या खरेदीसाठी सरकारला मर्यादा आहेत. पेट्रोल, डिझेल या इंधनांना पर्याय म्हणून पऱ्हाट्या, बांबूपासून सेकंड जनरेशन इथेनाॅलच्या निर्मितीला मान्यता देण्यात आली. यामुळे शेतकऱ्यांना फायदा होईल तसेच रोजगार निर्मिती होईल. मक्या पासून थर्ड जनरेशन इथेनाॅलची निर्मिती करता येते. त्यासाठी उत्तर प्रदेशप्रमाणे महाराष्ट्रानेदेखील बायो फ्युएलची पाॅलिसी तयार करणे आवश्यक आहे, असे प्रतिपादन केंद्रीय रस्ते वाहतूक आणि महामार्ग, जलसंपदा, नदी विकास मंत्री नितीन गडकरी यांनी गुरुवारी (ता.१९) परभणी येथे केले.