सोलापुरात मेथी, कोथिंबीर प्रतिपेंढी १२ रुपये

सोलापूर ः सोलापूर कृषी उत्पन्न बाजार समितीच्या आवारात गतसप्ताहात भाज्यांना मागणी वाढली. त्यांचे दरही चांगलेच वधारले. मेथी, कोथिंबिरीला शंभर पेंढ्यांना प्रत्येकी १२०० रुपये दर मिळाला. त्यानुसार प्रतिपेंढी १२ रुपये इतका दर शेतकऱ्यांच्या पदरात पडला. त्याशिवाय दोडका, गवार, भेंडीचे दरही पुन्हा तेजीतच राहिले. 

बाजार समितीच्या आवारात गतसप्ताहात भाज्यांची आवक प्रत्येकी १० ते १५ हजार पेंढ्यांपर्यंत राहिली. भाज्यांची सगळी आवक स्थानिक भागातूनच झाली. फक्त कोथिंबिरीची आवक नजीकच्या उस्मानाबाद, लातूर भागातून झाली; पण मागणी चांगली असल्याने भाज्यांचे दर चांगलेच वधारले. यापूर्वीच्या सप्ताहाच्या तुलनेत दरामध्ये चांगलीच सुधारणा झाली. त्यातही मेथी, कोथिंबिरीला चांगला उठाव मिळाला.

मेथी आणि कोथिंबिरीला शंभर पेंढ्यांसाठी प्रत्येकी ५०० ते १२०० व सरासरी ८०० रुपये इतका दर मिळाला. त्याशिवाय शेपूला ३०० ते ५०० रुपये असा दर मिळाला. त्याशिवाय फळभाज्यामध्ये दोडका, गवार, भेंडीलाही या सप्ताहात पुन्हा मागणी राहिली. त्यांचे दरही टिकून होते. दोडक्‍याची आवक रोज २०० क्विंटल, गवारची २० क्विंटल आणि भेंडीची ३० क्विंटल इतकी आवक राहिली. दोडक्‍याला प्रतिदहा किलोसाठी १०० ते १८० रुपये, गवारला २०० ते ४०० रुपये, भेंडीला १५० ते ३५० रुपये असा दर मिळाला. 

कांद्याचे दर टिकून कांद्याची आवक आणि दरही या सप्ताहात पुन्हा टिकून राहिले. त्यांची आवक रोज प्रत्येकी ४० ते ७० गाड्या झाली. कांद्याची सगळी आवक बाहेरील जिल्ह्यातून झाली. स्थानिक भागातील आवक तुलनेने फारच कमी राहिली. कांद्याला प्रतिक्विंटल ३०० ते २१०० व सरासरी ११०० रुपये असा दर मिळाला.