बदनामी करणाऱ्यांना शिक्षा देणार की नाही?

मुंबई : मागील २५ ते ३० वर्षांच्या काळात सभागृहाचा सदस्य असताना एकही आरोप झाले नाहीत. मात्र मंत्रिपदावर बसल्यावर माझ्यावर वारेमाप आरोप करण्यात आले. त्या आरोपांची अँटिकरप्शन, सीआयडी, लोकायुक्तमार्फत चौकशी केली. मात्र त्यातील माझ्यावरचा एकही आरोप सिद्ध झालेला नाही. बेछूट आरोप करणाऱ्या व्यक्तींवर कारवाई करणार का, असा सवाल भाजपचे ज्येष्ठ नेते एकनाथ खडसे यांनी करत कारवाईबाबत धोरण स्पष्ट करावे, असे आवाहनही विधानसभेत मंगळवारी (ता. ६) केले.

मूळ प्रश्न वसईचे आमदार हितेंद्र ठाकूर यांनी उपस्थित केला. विधान परिषदेचे विरोधी पक्षनेते धनंजय मुंडे यांच्यावर आणि माझ्यावर काही जणांनी आरोप करत आम्हाला बदनाम करण्याचा प्रयत्न केला. अशा आरोप करणाऱ्यांची चौकशी करण्याची मागणी श्री. ठाकूर यांनी केली.

या मुद्द्याला सभागृहातील सर्व आमदारांनी उचलून धरले. यावर अनेकांनी बोलण्याची इच्छा प्रकट केली. धुळ्याचे आमदार अनिल गोटे यांनीही या मुद्द्याला उचलून धरत धनंजय मुंडेंची सीडी मी स्वतःच व्हायरल केली, असे सांगितले. याचा एकदा सोक्षमोक्ष लागू द्या असे ते म्हणाले. गोटे यांच्याकडे तीनशे सीडी असल्याबाबत ते मीडियाशी बोलले, त्या ताब्यात घ्या आणि चौकशी करा, असेही ठाकूर म्हणाले. यावर तथ्यहीन आरोप करून लोकप्रतिनिधींची बदनामी करणाऱ्यांवर काय कारवाई करता येऊ शकेल याबाबत नियम तपासले जातील, असे आश्वासन मुख्यमंत्र्यांनी दिले.