ठिबक अनुदानासाठी चुकीचे अर्ज रद्द होणार

पुणे : कृषी खात्याच्या ठिबक अनुदानासाठी ऑनलाइन अर्ज भरताना चूक झाली असल्यास अर्ज ‘डिलिट’ करण्याची सुविधा न देण्याचा निर्णय राज्य शासनाने घेतला आहे. त्यामुळे शेतकऱ्यांना आता तालुका कृषी अधिकारी कार्यालयात जाऊन अर्ज रद्द करून घ्यावे लागतील. तसेच अनुदानासाठी पुन्हा नव्याने अर्ज भरावा लागणार असल्याची माहिती सूत्रांनी दिली. 

यंदा दोन लाख शेतकऱ्यांनी ठिबकसाठी अर्ज केले आहेत. यातील किती अर्ज चुकीचे आणि किती बरोबर याचा डाटा कृषी विभागाकडे उपलब्ध नसून, शेतकऱ्यांना ऑनलाइन भरलेला अर्ज चुकीचा असल्याची माहिती फक्त डीलरकडेच मिळणार आहे.

त्यामुळे शेतकऱ्यांना भलत्याच डोकेदुखीला सामोरे जावे लागण्याची शक्यता आहे.  आतापर्यंत एक लाख ३३ हजार शेतकऱ्यांच्या प्रस्तावांना कृषी विभागाने पूर्वसंमती दिली आहे. पूर्वसंमती असली तरच शेतकरी अनुदानाला पात्र ठरतो. मात्र, आता चुकीचा अर्ज भरल्यामुळे संबंधित शेतकऱ्यांना अनुदान मिळणार नसल्याचे स्पष्ट झाले आहे.

‘अर्ज चुकीचा भरल्याची माहिती मिळाल्यानंतर शेतकऱ्याने सरळ तालुका कृषी कार्यालयात जाऊन आधीचा अर्ज रद्द करून घ्यावा. त्यानंतर पुन्हा अर्ज भरल्यानंतर संबंधित शेतकरी अनुदानास पात्र राहतील.

मुळात अर्ज भरताना दुरुस्तीसाठी ऑप्शन देण्याची आवश्यकता होती. मात्र, दुरुस्तीचा पर्याय (ऑप्शन फॉर डिलिट) देण्यास राज्य शासनाने नकार दिल्याचे तालुका पातळीवरील अधिकाऱ्यांचे म्हणणे आहे. दरम्यान‘शेतकऱ्याचा चुकीचा अर्ज संबंधित कार्यालयाने रद्द केला, तरी पूर्वसंमतीची रक्कम तालुकास्तरावरच जमा राहील,’ असेही सूत्रांनी स्पष्ट केले. 

आठ दिवसांत पूर्वसंमती देणार - पोकळे  ‘ई-ठिबक ऑनलाइन प्रणालीत चुकीचा अर्ज भरलेल्या शेतकऱ्यांची संख्या राज्यात कमी असण्याची शक्यता आहे. काही ठिकाणी आधार कार्ड आणि बॅंक खाते पुस्तकात नावात किरकोळ बदल असल्यामुळे अर्ज अपात्र ठरत आहेत. अर्ज रद्द केला तरी आम्ही नव्या अर्जाला आठ दिवसांत संमती देणार आहोत,’ असे फलोत्पादन संचालक प्रल्हादराव पोकळे यांनी सांगितले.