वरवंड, जि. पुणे : "सरकारच्या शेतीविरोधी धोरणामुळे शेतकरी अडचणीत आहे. शेतकरी जगाचा पोशिंदा आहे. शेतकऱ्याने नाही पिकवले; तर सरकार लोकांना काय पिझ्झा खायला घालणार काय?'' असा सवाल माजी उपमुख्यमंत्री अजित पवार यांनी केला.
कानगाव (ता. दौंड) येथील शेतकऱ्यांनी दोन नोव्हेंबरपासून पुकारलेल्या राज्यव्यापी शेतकरी आक्रोश आंदोलनास अजित पवार यांनी शनिवारीदुपारी दोन वाजता अचानक भेट दिली. त्या वेळी ते बोलत होते.
या वेळी त्यांनी आंदोलनातील मागण्यांबाबत शेतकरी आक्रोश समितीचे माउली शेळके, भानुदास शिंदे, सयाजी मोरे यांच्याशी चर्चा केली.
"आंदोलनातील शेतकऱ्यांच्या मागण्या रास्त आहेत. आंदोलन करणे त्यांचा अधिकार आहे. सरकारने सकारात्मक तोडगा काढण्यासाठी पुढे तर आले पाहिजे, असे अजित पवार म्हणाले.
याप्रसंगी जिल्हा बॅंकेचे अध्यक्ष रमेश थोरात, राष्ट्रवादी कॉंग्रेसचे तालुकाध्यक्ष अप्पासाहेब पवार, जिल्हा परिषद सदस्य वीरधवल जगदाळे, अजित बलदोटा, सत्वशील शितोळे, महेश भागवत, नितीन दोरगे, विकास खळदकर, नाना फडके आदी उपस्थित होते.
अजित पवार म्हणाले, ""सरकारच्या शेतीविरोधी धोरणामुळे साखरेचे बाजार कमी होत चालले आहे. साखरेला 45 रुपये प्रतिकिलो दर मिळाला, तर उसाला अपेक्षित दर मिळू शकतो. कारखान्यामधील उसाच्या मॉलेसीसला प्रचंड टॅक्‍स लावला. याचा अप्रत्यक्षरीत्या शेतकऱ्यांना फटका बसत आहे."
"आमच्या काळात विजेच्या अडचणी मोठ्या प्रमाणात सोडविण्यात आल्या. नोटाबंदी व "जीएसटी'मुळे सर्वांनाच मोठा फटका सहन करावा लागत आहे. माजी केंद्रीय कृषिमंत्री शरद पवार यांच्यासारखा शेतकऱ्यांची नाडी ओळखणारा नेता सरकारमध्ये नाही.''
दौंड तालुक्‍याच्या राजकारणाबाबत अजित पवार म्हणाले, ""आम्ही सत्तेत असताना जनतेची कामे केली. मात्र, जनतेने आम्हालाच बाजूला काढले अन्‌ ज्यांनी कारखाना बंद पाडला, त्यांच्याच मागे उभे राहिले. हे वागणं बरं नाही.''
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.