मुख्यमंत्री शाळा बंद करताहेत : अजित पवार

बीड : सरकार मस्तीत आहे. पंतप्रधान नरेंद्र मोदींच्या पावलावर पाऊले ठेवून मुख्यमंत्री काम करत आहेत. मोदींनी नोटाबंदीचा निर्णय घेतला. त्यामुळे विकासदर घटला. तसा मुख्यमंत्री देवेंद्र फडणवीस शाळा बंद करून सामान्यांच्या मुलांचे शिक्षण बंद करत असल्याचा आरोप माजी उपमुख्यमंत्री तथा राष्ट्रवादी काँग्रेसचे विधिमंडळातील नेते अजित पवार यांनी केला.  हल्लाबोल यात्रेत बुधवारी (ता. १७) जिल्ह्यात पाटोदा व बीड येथे सभा झाल्या. तिसरी सभा गुरुवारी (ता. १८) गेवराई येथे झाली. या वेळी राष्ट्रवादी काँग्रेसचे प्रदेशाध्यक्ष सुनील तटकरे, विरोधी पक्षनेते धनंजय मुंडे, माजी मंत्री राजेश टोपे, माजी मंत्री प्रकाश सोळंके, आमदार अमरसिंह पंडित, सतीश चव्हाण, विद्या चव्हाण, विक्रम काळे, महिला आघाडीच्या चित्रा वाघ, युवक आघाडीचे संग्राम कोते पाटील उपस्थित होते.  श्री. पवार म्हणाले, की या शासनाच्या निर्णयांची लोकांना ऊब आली आहे. या सरकारला सामान्य, शेतकरी, व्यापाऱ्यांबद्दल प्रेम, आपुलकी, जिव्हाळा राहिलेला नाही. शेतीमालाला भाव नाही. यंदा चांगला पाऊस झाल्याने नदी, तलाव, कॅनाल, बंधाऱ्यांमध्ये मुबलक पाणी आहे; पण वीज नसल्याने पिकांना पाणी देता येत नाही. परिणामी रब्बी हंगाम हातचा जाण्याची वेळ आली आहे. जरा सबुरीने घ्या, रब्बीपर्यंत वीज द्या, असे आवाहन त्यांनी आपल्या खास शैलीत सरकाला दिले. या सरकारच्या निर्णयाची किव करावी वाटते. दिवंगत नेते यशवंतराव चव्हाणांनी ज्येष्ठ नेते शरद पवारांना बेरजेचे राजकारण शिकवले. तेच राजकारण आपण पुढे नेत आहोत. पुढच्या काळात ज्येष्ठांचा अनुभव आणि नव्यांना सोबत घेऊन राजकारण करायचे आहे. सरकार मस्तीत असून, त्यांची मस्ती उतरविण्यासाठी आगामी निवडणुकांत निट बटने दाबा. अमरसिंह पंडित यांनी मोठ्या प्रयत्नाने जयभवानी सहकारी साखर कारखाना सुरू केला. त्यामुळे या भागातील शेतकऱ्यांना मोठा दिलासा भेटला आहे.  या वेळी धनंजय मुंडे, सुनील तटकरे, आमदार अमरसिंह पंडित, नवाब मलिक, जयसिंह सोळंके, महेबूब शेख यांचीही भाषणे झाली. या वेळी संग्राम कोते पाटील, संदीप क्षीरसागर, सुरेखा ठाकरे, सोनल देशमुख, राजेंद्र जगताप, बजरंग सोनवणे, रेखा फड उपस्थित होते. प्रास्ताविक संयोजक माजी जिल्हा परिषद अध्यक्ष विजयसिंह पंडित यांनी केले. तत्पूर्वी अजित पवारांच्या स्वागतार्थ विजयसिंह पंडित यांच्या नेतृत्वाखाली युवकांची मोठी दुचाकी फेरी निघाली. सभेला मोठी गर्दी होती.