दुष्काळग्रस्त शेतकऱ्यांना हेक्टरी ५० हजार मदत द्या : अजित पवार

मुंबई: राज्यातील दुष्काळ परिस्थिती पाहण्यासाठी केंद्राचे पथक येणार असल्याची घोषणा सरकारने केली. दुष्काळाने शेतकरी हतबल झाला आहे. आत्महत्या झाल्यानंतर केंद्राचे पथक पाहणीला येणार का? असा संतप्त सवाल करीत दुष्काळ जाहीर करण्यासाठी केंद्रीय पथकाला विशेष विमानाने घेऊन या. शेतकऱ्यांना हेक्टरी ५० हजार मदत द्या, भारनियमन बंद करा, अशी मागणी माजी उपमुख्यमंत्री अजित पवार यांनी गुरुवारी (ता. २५) केली. पत्रकार परिषदेत अजित पवार यांनी केंद्र आणि राज्य सरकारच्या भोंगळ कारभारावर सडकून टीका केली. ‘‘या वर्षीचा दुष्काळ १९७२ पेक्षा भीषण आहे. जुन्या पद्धतीने दुष्काळ जाहीर करावा, याबाबतचे पत्र धनंजय मुंडे यांनी जानेवारी महिन्यातच राज्य सरकारला दिले होते. पण सरकारचे क्लिष्ट नियोजन पाहता याचा शेतकऱ्यांना नाहक त्रास होत आहे. राज्यातील सध्याची हवामान परिस्थिती पाहता पिण्याच्या पाण्यासाठी तसेच शेतीसाठी, धरणासाठी, जनावरांना पिण्यासाठी किती पाणी लागेल, याचे नियोजन सरकारने आताच केले पाहिजे, अशी सूचनाही त्यांनी केली.  ‘‘अरबी समुद्रात पंतप्रधान नरेंद्र मोदी यांनी दोन वर्षांपूर्वीच छत्रपती शिवाजी महाराज यांच्या स्मारकाचे भूमिपूजन केले. त्यानंतर प्रत्यक्षात कामाला सुरवात व्हायला हवी होती. परंतु  स्मारकाच्या तिथे पुन्हा जाऊन नारळ फोडण्याचे कारणच नव्हते, त्यामुळे पंतप्रधानांनी केलेले शिवस्मारकाचे भूमिपूजन कोणाला आवडले नव्हते काय,’’अशी टीका श्री. पवार यांनी केली. या वेळी धनंजय मुंडे, नवाब मलिक उपस्थित होते.  `तेव्हा शिवसेना गप्प होती ’ छत्रपती शिवाजी महाराज यांच्या स्मारकाची उंची कमी करण्याबाबत सरकार जेव्हा बैठक घेत होते तेव्हा शिवसेनेचे सुभाष देसाई त्या वेळी उपस्थित होते. खरंतर त्याचवेळी त्यांनी विरोध करत बैठकीतून उठून जायला पाहिजे होते. ते बैठकीत केवळ डोसा खायला गेले होते का?  किंमत कमी करण्यामागे सरकारचा नेमका घोटाळा काय आहे याबाबत आम्ही येत्या हिवाळी अधिवेशनात आवाज उठवू. नियम धाब्यावर बसवून शिवस्मारकाच्या पायाभरणीचा कार्यक्रम घेतल्यामुळे बुधवारी दुर्घटना घडली, असे विखे पाटील म्हणाले.