'सरकारला दुष्काळाची दाहकता लक्षात येईना'

पुणे  : यंदा ऑक्टोबर महिन्यातच धरणांमधील पाणीसाठा कमी झाला अाहे. अजून सात महिने जायचे आहेत. येत्या काही दिवसांत पाणी टंचाई वाढून मोठ्या संख्येने टँकर सुरू करावे लागतील. लोकांच्या हाताला काम द्यावे लागेल, जनावरांच्या छावण्या सुरू कराव्या लागतील. मात्र सरकार त्यासाठी पावले उचलताना दिसत नाही. राज्यात दुष्काळाची दाहकता किती आहे, हे सरकारच्या लक्षात येत नाही, अशी टीका माजी उपमुख्यमंत्री अजित पवार यांनी सरकारवर केली.

जिल्हा परिषदेच्या अखर्चित निधीचा आढावा घेण्यासाठी नुकत्याच (बुधवारी) झालेल्या बैठकीनंतर श्री. पवार बोलत होते. जिल्हा परिषदेचे अध्यक्ष विश्वास देवकाते, उपाध्यक्ष विवेक वळसे पाटील या वेळी उपस्थित होते. 

श्री. पवार म्हणाले, की राज्यात दुष्काळी स्थिती असल्याने ज्यांची खरिपाची पिके गेली आहेत, त्यांना ५० हजारांची मदत जाहीर करावी, अशी मागणी केली होती. मात्र, दुष्काळचा आढावा घेण्यासाठी आता केंद्राचे पथक येणार, पाहणी करणार मग दुष्काळ जाहीर होणार अशी स्थिती आहे. खरे तर, राज्यात किती भयानक दुष्काळ आहे याचा अंदाज अद्याप सरकारला नाही. ऑक्टोबर महिन्याच्या शेवटी धरणे शंभर टक्के भरलेली असतात. त्यानुसार पाण्याचे नियोजन केले जाते. मात्र, परतीचा पाऊसच न झाल्याने अात्ताच धरणांमधील दहा ते वीस टक्के पाणी वापरले गेले आहे. त्यामुळे येत्या काळात पाण्याचा गंभीर प्रश्न निर्माण होणार आहे.

दुष्काळ आढाव्याच्या पहिल्या टप्प्यात जिल्ह्यातील दहा तालुके दुष्काळग्रस्त असल्याचे समोर आले आहे. त्यामुळे यापुढे शहर आणि ग्रामीण यामध्ये सुुरू असणारा पाण्याचा वाद आणखी पेटण्याची चिन्हे आहेत. मी दहा वर्षे पालकमंत्री होतो, त्या काळात हा वाद कधीच होऊ दिला नाही. मात्र, आता पाण्याचे नियोजनच नाही, अशी टीका अजित पवार यांनी पालकमंत्री गिरीश बापट यांचे नाव न घेता केली.