कायदा हातात घेण्याची वेळ आणू नका

उस्मानाबाद : आम्ही कायदा हातात घेत नाही, तशी वेळ आणू नका, शेतकऱ्यांच्या कृषिपंपाचा वीजपुरवठा तोडला, तर सरकारला आणि ऊर्जा विभागाच्या अधिकाऱ्यांना राज्यात फिरू देणार नाही, असा इशारा राष्ट्रवादी काँग्रेसचे नेते अजित पवार यांनी दिला.

राष्ट्रवादी काँग्रेसच्या वतीने भाजप- शिवसेनेच्या फसव्या सरकारविरुद्ध मराठवाडा पातळीवर मंगळवारी (ता. १६) उस्मानाबाद येथे जिल्हाधिकारी कार्यालयासमोर आंदोलन करण्यात आले. यावेळी आयोजित सभेत श्री. पवार बोलत होते. या वेळी खासदार सुप्रिया सुळे, राष्ट्रवादी काँग्रेसचे प्रदेशाध्यक्ष सुनील तटकरे, विधानसभेचे माजी सभापती दिलीप वळसे पाटील, विधान परिषदेतील विरोधी पक्षनेते धनंजय मुंडे, माजी मंत्री डॉ. पद्मसिंह पाटील, आमदार राणाजगजितसिंह पाटील, विक्रम काळे, राहुल मोटे, राजेश टोपे, जयदत्त क्षीरसागर, विद्या चव्हाण, चित्रा वाघ, नवाब मलिक, जिल्हा परिषदेचे अध्यक्ष नेताजी पाटील यांची प्रमुख उपस्थिती होती.

श्री. पवार म्हणाले, सहा महिने झाले तरी कर्जमाफीचा लाभ शेतकऱ्यांना मिळाला नाही. त्यामुळे शेतकरी आर्थिक अडचणीत आहे. अशा परिस्थितीत राज्य सरकार शेतकऱ्यांच्या कृषिपंपांची वीज तोडत आहे. शेतकऱ्यांकडे सध्या पैसा नाही. शेतकऱ्यांच्या कृषिपंपांची वीज तोडल्यास सरकार व ऊर्जा विभागाच्या अधिकाऱ्यांना राज्यात फिरू देणार नाही, असा इशारा श्री. पवार यांनी दिला. श्री. मुंडे म्हणाले, की सर्वसामान्यांच्या प्रश्नांवर राष्ट्रवादी काँग्रेसने हल्लाबोल आंदोलन सुरू केले आहे. राष्ट्रवादीची बांधिलकी सर्वसामान्यांशी आहे. 

तुळजाभवानीचे दर्शन घेऊन हल्लाबोल आंदोलनाला सुरवात राष्ट्रवादी कॉंग्रेसच्या हल्लाबोल आंदोलनाचा दुसरा टप्पा मंगळवारी (ता. १६) तुळजापुरातून सुरू झाला. महाराष्ट्राची कुलस्वामिनी आई तुळजा भवानीच्या दरबारात सकाळी जागरण गोंधळ घालून साकडं घालत आंदोलनाची सुरवात करण्यात आली. त्यासाठी राष्ट्रवादीचे अनेक नेते तुळजापुरात दाखल झाले होते. या वेळी तहसीलवर मोर्चा काढून निवेदन देण्यात आले.