अकोला जिल्हा सहकारी बॅंक ठरली भारतात उत्कृष्ट

अकोला ः अकोला जिल्हा मध्यवर्ती सहकारी बॅंकेला भारतातील उत्कृष्ट जिल्हा सहकारी बॅंक म्हणून हैद्राबाद येथे झालेल्या कार्यक्रमात गौरविण्यात अाले. ही बँक ११० व्या वर्षांत पदार्पण करीत असताना हा सन्मान झाला अाहे. राष्ट्रीय स्तरावरील ‘इनमा’ या आर्थिक सर्वेक्षण संस्थेने बॅंको राष्ट्रीय पुरस्कार देऊन सन्मानित केले. बॅंकेच्या सन्मानात या पुरस्कारामुळे आणखी एक मानाचा तुरा खोवला गेला आहे.             हैद्राबाद येथे झालेल्या कार्यक्रमात तेलंगाणा राज्याचे उपमुख्यमंत्री मो महेमुद अली, आयडीआरबीटीचे संचालक डॉ. ए. एस. रामाशास्त्री तसेच रमेश कुमार बंग यांच्याहस्ते ‘बॅंको पुरस्कार’देण्यात अाला. बँकेच्या वतीने मुख्य कार्यकारी अधिकारी अनंत वैद्य, कर्जे व देखरेख विभागाचे व्यवस्थापक प्रभुदास शेंडे व हिशेब व बँकिंग विभागाचे व्यवस्थापक शिवप्रसाद मोहोड यांनी हा पुरस्कार स्वीकारला. ‘इनमा’ या राष्ट्रीय आर्थिक संस्थेने देशभरातील जिल्हा मध्यवर्ती सहकारी बॅंकांचा सर्वांगीण अभ्यास करून बॅंको पुरस्काराकरिता अकोला जिल्हा मध्यवर्ती सहकारी बंकेची उत्कृष्ट जिल्हा मध्यवर्ती सहकारी बॅंक म्हणून निवड केली.

सर्वांच्या सहकार्यामुळे यश : डॉ. कोरपे या पुरस्काराबाबत अकोला जिल्हा मध्यवर्ती सहकारी बॅंकेचे अध्यक्ष डॉ. संतोषकुमार कोरपे म्हणाले, अकोला व वाशीम जिल्ह्यातील शेतकरी, शेतमजूर, ग्राहक, ठेवीदार, भागदारक व हितचिंतकांचा बॅंकेवरील दृढ विश्वासामुळेच सातत्याने प्रगती होत अाहे. बॅंकेवरील विश्वास हाच सर्वोत्कृष्ट पुरस्कार आहे. जनतेच्या विश्वासावर बॅंक  सातत्त्याने प्रगतिपथावर राहील असा विश्वास अाहे.