अकोला जिल्ह्यात केवळ ३१ टक्के पीक कर्जवाटप

अकोला : शेतकऱ्यांना खरीप हंगामात अधिकाधिक पीककर्ज देऊन अार्थिक पाठबळ देण्याच्या घोषणा राज्यकर्त्यांनी केल्या खऱ्या; मात्र तांत्रिक अडचणी आणि बँकांच्या नकारात्मक भूमिकेमुळे अकोला जिल्हयात १३३४ कोटींचे उद्दिष्ट अवघे ४११ कोटींवरच गुंडाळले गेले. एकूण कर्जाच्या केवळ ३१ टक्केच पीक कर्जवाटप झाले असून, जिल्ह्यात ६९ टक्के शेतकरी पीककर्जापासून वंचित राहले अाहेत. विशेष म्हणजे खरीप हंगामातील अाढावा बैठकांत पीक कर्जवाटपाची गती वाढवण्याची सूचना करण्यात अाली होती. कारवाईबाबत इशारेही देण्यात अाले होते.    

खरीप हंगामासाठी एक एप्रिलपासून पीक कर्जवाटपाला सुरवात झाली. हंगाम संपेपर्यंत म्हणजेच २९ सप्टेंबरपर्यंत केवळ ३१ टक्के कर्जवाटप झाले. जिल्ह्यात असलेल्या राष्ट्रीयीकृत बँकांची कामगिरी अत्यंत निराशाजनक राहिली. कर्जमाफीची प्रक्रिया अद्यापही पूर्ण झालेली नसल्याने पीक कर्जवाटपात असंख्य तांत्रिक अडचणी अाल्या. त्याचा फटका वाटपाला बसल्याचे बँक व्यवस्थापनांकडून वारंवार सांगितले जात होते. हंगाम अाटोपला तरीही या अडचणी दूर झाल्या नाहीत.   जिल्हा बॅंकेला ६५० कोटी रुपये वाटप करायचे होते. या बँकेने सप्टेंबरअखेर १८४ कोटींचे वितरण केले. ही सरासरी २८ टक्के एवढी अाहे. 

कर्जमाफीचे लाभार्थी पात्र असतानाही कागदपत्रांची पूर्तता करू शकत नसल्याने वंचित राहले. त्यांचे खातेही नील झालेले नाहीत. शिवाय नियमित खातेदारांनी चालू कर्ज न भरल्याने त्यांनाही पुन्हा कर्ज मिळण्यात अडचणी अालेल्या अाहेत. लवकरच रब्बी हंगाम सुरू होत अाहे. या हंगामासाठी बँकांकडून पीककर्ज मिळेल किंवा नाही, याची काहीच शाश्वती सध्या दिसत नाही.