अकोले तालुक्‍यात बाजरीच्या मळणीला वेग

लिंगदेव, जि. नगर  ः अकोले तालुक्‍यात पावसाळी बाजरीची मळणी अंतिम टप्प्यात आली आहे. गत चार ते पाच वर्षांपासून बाजरीचे क्षेत्र घटल्याने खळ्यावरील बाजरीची तोडणी तर कुठे मळणी हे चित्र आता दुर्मीळ होऊ पाहत आहे.

आदिवासी भाग असलेल्या अकोले तालुक्‍यात बाजरीचे पीक जास्त प्रमाणात घेतले जाते. तालुक्‍यात पाण्याची उपलब्धता आणि नगदी पिकांकडे वळलेले शेतकरी यामुळे बाजरीचे लागवडीचे क्षेत्र दिवसेंदिवस घटत चालले आहे. यंदा बाजरीचा उतारा चांगला असला तरी लागवड क्षेत्र घटले आहे. त्यामुळे यंदा बाजारपेठेत बाजरी भाव खाण्याचीही शक्‍यता आहे. गत चार ते पाच वर्षांपासून बाजरी पिकाची जागा सोयाबीन आणि मका पिकांनी घेतली आहे. हंगामात चार हजार आठशे ६२ हेक्‍टर क्षेत्रावर अकोले तालुक्‍यात बाजरीची पेरणी झाली होती. सोयाबीन, मकाही जास्त पेरली जाऊ लागली. मा्त्र  भुईमूग, भाजीपाला, फुलशेती, तेलबिया आदी क्षेत्रही कमी झाले आहे.