महसूल कर्मचाऱ्यांचा आज आक्रोश मुंडण मोर्चा

चंद्रपूर : न्याय्य मागण्यांच्या पूर्ततेसाठी राज्य महसूूल कर्मचारी संघटनेच्या वतीने सोमवारी (ता. 18) नागपूर हिवाळी अधिवेशनावर मोर्चाच्या माध्यमातून धडक दिली जाणार आहे. त्यासाठी महसूल कर्मचाऱ्यांनी सोमवारी सामूहिक रजा घेतली असून, बल्लारपूर उपविभागीय अधिकारी क्रांती डोंबे यांना निवेदन सादर करून मुख्यालय सोडण्याची परवानगी संघटनेच्या पदाधिकाऱ्यांनी मागितली.

राज्य महसूल कर्मचारी संघटनेच्या वतीने सोमवारी हिवाळी अधिवेशनावर मोर्चा नेण्यात येईल. जुनी पेन्शन योजना सुरू ठेवावी, नवी पेन्शन योजना कर्मचाऱ्यांना गोंधळात टाकणारी आहे. त्यामुळे महसूल कर्मचारी संघटनेत आक्रोश बळावला आहे. कर्मचाऱ्यांच्या वेतनातून दहा टक्‍के रक्‍कम कपात करून खासगी कंपन्यांना देण्याचा घाट घालण्यात आला आहे. त्या माध्यातून पेन्शन दिले जाणार आहे. मात्र कर्मचाऱ्यांची कोणतीही रक्‍कम जमा होत नाही. त्याचा लेखाजोखाही शासनाजवळ नाही. यामुळे भविष्यात निवृत्तिवेतन मिळेल याची शाश्‍वती नसल्याचे महसूल कर्मचाऱ्यांचे म्हणणे आहे. शासन सेवेत 30 ते 35 वर्षे सेवा करून यामुळे पदरात काहीच पडणार नाही, अशी संभ्रमवस्था कर्मचाऱ्यांमध्ये आहे. याचा जाब सरकारला विचारण्यासाठी सोमवारी महसूल कर्मचारी महाआक्रोश मुंडण मोर्चा काढणार आहेत.

बल्लारपूर येथील उपविभागीय अधिकारी क्रांती डोंबे यांना याविषयी निवेदन देत मुख्यालय सोडण्याची परवानगी मागण्यात आली. या वेळी राज्य महसूल कर्मचारी संघटनेचे जी. डी. उपरे, पी. बी. नारनवरे, पौर्णिमा नेताम, प्रियंका खाडे, शोभा मुंडरे, अजय मेकलवार यांच्यासह पदाधिकारी होते.