हमीभाव ठरविताना सर्व खर्च धरणार : पंतप्रधान मोदी

हमीभाव ठरविताना सर्व खर्च धरणार : पंतप्रधान मोदी
हमीभाव ठरविताना सर्व खर्च धरणार : पंतप्रधान मोदी

नवी दिल्ली ः केंद्र सरकार शेतीमालाचा हमीभाव ठरविताना शेतकऱ्यांना करावा लागणारा सर्व खर्च गृहीत धरणार आहे. शेतकऱ्यांना योग्य भाव मिळावा यासाठी जमीन भाडे आणि व्याजासह सर्व खर्चांचा विचार हमीभाव ठरविताना सरकार करणार आहे, अशी माहिती पंतप्रधान नरेंद्र मोदी यांनी दिली. रविवारी (ता. २५) मन की बात या कार्यक्रमात ते बोलत होते. पंतप्रधान नरेंद्र मोदी म्हणाले, ‘‘२०१८-१९ चा अर्थसंकल्प सादर करताना सरकारने शेतीमालाला उत्पादनखर्चावर ५० टक्के नफा देणार असल्याचे जाहीर केले आहे. उत्पादनखर्च ठरविताना A2+FL किंवा C2 खर्च गृहित धरणार याबाबत गोंधळ निर्माण झाला होता. A2+FL खर्चामध्ये बियाणे, कीडनाशके, खते, कामावर लावलेल्या मजुरांचा खर्च, इंधन आणि सिंचन आणि कुटुंबातील कामगारांनी केलेल्या कामाचा मोबदला याचा समावेश होतो. तर C2 मध्ये उत्पाद खर्च अधिक व्यापकपणे धरला जातो. यामध्ये स्थायी भांडवलावर भाड्यापोटी जाणारा खर्च आणि व्याजाचा समावेश आहे.  ‘‘सध्या सरकार रब्बीमधील ६ आणि खरिपातील १४ पिकांसाठी हमीभाव जाहिर करते.  सध्या सरकार हमीभाव ठरविता A2+FL खर्चाचा विचार करते. हा खर्च C2 पेक्षा खूपच कमी येतो. तसेच सरकार शेतकऱ्यांचे उत्पन्न वाढविण्यासाठी आणि शेतकऱ्यांना त्यांच्या मालाला योग्य दर  मिळावा यासाठी शेती सुधारणा मोठ्या प्रमाणात करत आहे. सरकार स्थानिक बाजारांना घाऊक आणि आंतरराष्ट्रीय बाजाराशी जोडणार आहे. ‘ग्रामीण हाट’चा विकास करून त्यांना बाजार समित्यांशी जोडणार आहे. त्यामुळे शेतकऱ्यांना आपला शेतीमाल विकण्यासाठी दूर जावे लागणार नाही,’’ असेही ते म्हणाले.    पंतप्रधान म्हणाले...

  •  शेतकऱ्यांच्या विकासासाठी सरकार कटिबद्ध
  •  हमीभाव ठरविताना इतर खर्चासोबत जमीन भाडे आणि व्याज खर्चाचाही समावेश 
  •  शेती विकासासाठी शेती सुधारणांवर भर
  •  स्थानिक बाजारांना राष्ट्रीय व आंतरराष्ट्रीय बाजाराशी जोडणार
  •  ‘ग्रामीण हाट’ला बाजार समित्यांशी जोडणार
  • उत्पादन खर्चात या खर्चांचा समावेश मजुरांचा खर्च, स्वतःच्या जनावरांवर होणार खर्च तसेच जनावरे आणि यंत्राचे भाडे, बियाणे खर्च, वापरलेल्या प्रत्येक प्रकारच्या खतांच्या खर्च, सिंचन खर्च, राज्य सरकारला दिलेला जमिनीचा महसूल, वापरातील भांडवलावर द्यावे लागणारे व्याज, जमीन भाडेपट्टीवर घेतली असल्यास त्याचे भाडे, याशिवाय स्वतःच्या शेतीत काम केलल्या शेतकऱ्याची किंवा कुटुंबातील इतर सदस्यांनी त्याला कामात मदत केली त्यांचीही मजुरीही हमीभाव ठरविताना उत्पादन खर्चामध्ये गृहीत धरली जाईल, असे पंतप्रधान नरेंद्र मोदी यांनी सांगितले.

    Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

    ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

    Related Stories

    No stories found.
    Agrowon
    agrowon.esakal.com