अमरावती लोकसभेसाठी होईल दुहेरी लढत

आनंदराव अडसूळ आणि नवनीत राणा दोघेही तुल्यबळ
आनंदराव अडसूळ आणि नवनीत राणा दोघेही तुल्यबळ

अमरावती : शिवसेनेकडून दोनदा संसदेत गेलेल्या आनंदराव अडसूळ यांच्या नावाविषयीची अनिश्‍चिता पहिल्याच यादीत संपली. त्यानंतर आता संयुक्‍त पुरोगामी आघाडीने नवनीत राणा यांना समर्थन दिल्याने अमरावती लोकसभा मतदारसंघातील लढत दुहेरीच होणार असल्याचे निश्‍चित झाले आहे.  आनंदराव अडसूळ यांच्यावर ‘मातोश्री’ नाराज असल्याची चर्चा उठली होती. दोन वेळा त्यांनी शिवसेनेच्या तिकीटावर लढत संसेदत प्रतिनिधित्व केले. या वेळी ‘मातोश्री’च्या नाराजीमुळे तिसऱ्यांदा त्यांना तिकीट मिळेल किंवा नाही; याबाबत तर्कवितर्क लावले जात होते. परंतु आनंदरावांचा समावेश शिवसेनेच्या पहिल्याच यादीत करण्यात आला आणि साऱ्या चर्चांना पूर्णविराम मिळाला. दुसरीकडे लोकसभेसाठी युवा स्वाभिमानीनेदेखील तयारी चालविली होती. युवा स्वाभिमानीच्या नेत्या नवनीत राणा यांना संयुक्‍त पुरोगामी आघाडी समर्थन देईल; अशी चर्चा आधीपासूनच होती. त्यानुसार शनिवारी (ता. २३) मुंबईतील पत्रकार परिषदेत याबाबत अधिकृत घोषणा करण्यात आली. त्यामुळे नवनीत राणा यांच्या उमेदवारीबाबतच्या अनिश्‍चिततेलाही ‘फुलस्टॉप’ लागला. त्यामुळे आता शिवसेना भाजप युतीचे उमेदवार आनंदराव अडसूळ तर दुसरीकडे आघाडी समर्थित अपक्ष उमेदवार नवनीत राणा यांच्यात थेट लढत होणार असल्याचे स्पष्ट झाले आहे. आक्रमकता दोन्ही बाजूने असल्याने या निवडणुकीत नेमके कोणते मुद्दे उदयास येतात, हा कुतूहलाचा विषय ठरणार आहे. सोमवारी (ता. २५) आनंदराव अडसूळ तर मंगळवारी (ता. २६) नवनीत राणा उमेदवारी अर्ज दाखल करणार आहेत.  नवनीत राणा यांनी यापूर्वी एक अर्ज दाखल केला आहे. दिवंगत राज्यपाल रा. सू. गवई यांच्या सहचारिणी कमलताई गवई यांनी नवनीत राणा यांच्यासाठी उमेदवारी अर्ज स्वीकारला होता. परिणामी दोन्ही उमेदवार तुल्यबळ असल्याने त्यांच्या लढतीमुळे रंगत येणार आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com