अरे बाबांनो, तुमची झोपमोड केली नाही : अजित पवार

नगर : माजी उपमुख्यमंत्री अजित पवार नेहमीच्या मोटारीऐवजी काल रात्री वेगळ्या वाहनातून अंबालिका कारखान्यावर आले. त्यांची नेहमीची मोटार नसल्याने प्रवेशद्वारावरच सुरक्षारक्षकांनी त्यांना अडविले. मात्र, पवार यांनी आपली परीक्षा घेतल्याचे कळताच त्यांना हायसे वाटले. त्याच वेळी त्यांनी आंदोलनस्थळी चक्कर मारली. मात्र, आंदोलक गाढ झोपेत होते. सकाळी आंदोलक भेटायला आल्यानंतर ते म्हणाले, "अरे बाबांनो, मी रात्रीच तुम्हाला भेटायला आलो होतो; पण तुमची झोपमोड केली नाही...! 

कर्जत तालुक्‍यात ऊसदरावरून शेतकरी संघटनेने अंबालिका साखर कारखान्याच्या प्रवेशद्वारासमोर ठिय्या आंदोलन सुरू केले होते. आंदोलक व कारखान्याचे जनरल मॅनेजर एस. बी. शिंदे यांच्यात झालेली चर्चा निष्फळ ठरली. याबाबत माहिती मिळताच पवार रात्रीच कारखाना कार्यस्थळावर आले. आंदोलकांसोबत चर्चा करण्यासाठी रात्रीच ते गेले. मात्र, त्या वेळी आंदोलक झोपेत असल्याने, त्यांनी आज "अंबालिका'च्या सभागृहात बैठक घेतली. 

अजित पवार यांनी आंदोलकांशी चर्चा केली. त्यानंतर "जिल्ह्यातील सर्व कारखाने ठरवतील त्यानुसार आम्हीही उसाचे पहिले पेमेंट देण्यास बांधील आहोत. लवकरच पहिले पेमेंट जाहीर करू,' अशी ग्वाही "अंबालिका'चे जनरल मॅनेजर एस. बी. शिंदे यांनी दिली. तसे पत्र त्यांनी शेतकरी संघटनेच्या कार्यकर्त्यांना दिले. त्यानंतर कार्यकर्त्यांनी कालपासून "अंबालिका'समोर सुरू केलेले ठिय्या आंदोलन आज मागे घेतले. मात्र, आश्‍वासनानुसार कार्यवाही न झाल्यास पुन्हा तीव्र आंदोलन करण्याचा इशारा त्यांनी दिला. 

शेतकऱ्यांवर अन्याय होऊ देणार नाही  "सध्या फक्त सांगली, कोल्हापूर जिल्ह्यांत ऊसदर जाहीर झाला आहे. राज्यातील इतर जिल्ह्यांतील दर जाहीर होणे बाकी आहे. ते जाहीर होऊ द्या; मी शेतकऱ्यांवर अन्याय होऊ देणार नाही. आम्ही प्रथम शेतकरी आहोत, नंतर राजकारणी,'' अशा शब्दांत पवार यांनी शेतकऱ्यांना दिलासा दिला.