सिल्लोड तालुक्‍यात मक्यावर आढळली अमेरिकन फॉल आर्मीवर्म अळी

औरंगाबाद : दुष्काळात उपलब्ध पाण्याच्या भरवशावर कशीबशी रब्बीची मका करावी म्हटलं, तर त्यावरही आता अमेरिकन फॉल आर्मीवर्म अर्थात स्पोडेप्टोरा फ्रुगीपर्डा या अळीचा प्रादुर्भाव झाल्याने शेतकरी हतबल झाले आहेत. सिल्लोड तालुक्‍यात आढळून आलेल्या प्रादुर्भावाची तज्ज्ञांनी मंगळवारी (ता. ३०) पाहणी करीत शेतकऱ्यांना त्यावरील उपाय सुचविले.

यंदा दुष्काळामुळे मराठवाड्यात रब्बीची आशा मावळली आहे. खरिपाच्या उत्पादनात मोठा फटका बसल्याने शेतकऱ्यांना उर्वरित साल कसं धकवावं, असा प्रश्न आहे. जनावरांच्या चाऱ्यासोबतच पाण्याचा प्रश्न भीषण रूप धारण करण्याची क्षमता आहे. जनावरांना चारा व्हावा व थोडं अर्थार्जन व्हावं म्हणून सिल्लोड तालुक्‍यातील आमठाणा शिवारातील शेतकऱ्यांनी रब्बी मकाची लागवड केली आहे. परंतु या मक्यावर अमेरिकन फॉल आर्मीवर्म (स्पोडोप्टेरा फ्रुगीपर्डा) किडीचा प्रादुर्भाव झाल्याचे समोर आले आहे.

माहिती मिळाल्यानंतर औरंगाबादच्या राष्ट्रीय कृषी संशोधन प्रकल्पाचे प्रमुख डॉ. एस. बी. पवार, कीटकशास्त्रज्ञ डॉ. एन आर. पतंगे, रामेश्वर ठोंबरे आदींनी कृषी विभागाच्या अधिकाऱ्यांसह आमठाणा येथील पांडुरंग कदम यांच्या प्रादुर्भावग्रस्त मका पिकाची पाहणी केली. या वेळी शेतकऱ्यांना या किडीच्या जीवनचक्राची माहिती कीटकशास्त्रज्ञ डॉ. पतंगे यांनी दिली.

या अळीची पिढी अंडी, अळी, कोष व पतंग अशा अवस्थेतून पूर्ण होते. एक पतंग साधारणत: एका रात्रीत शंभर किलोमीटर पर्यंतचा प्रवास करू शकतो. रात्रीच्या वेळी ही अळी मक्याची पाने खाऊन दिवसा पोंग्यात लपून बसते. मका निघाल्यानंतर खोल नांगरट करावी. गंध सापळ्यांचा वापर करावा. प्रादुर्भाव आढळल्यास प्रतिबंधात्मक फवारणी म्हणून पाच टक्‍के निंबोळी अर्काची फवारणी करावी किंवा शिफारशीत कीटकनाशकांचा वापर करावा, असा सल्ला डॉ. पतंगे यांनी दिला.