कासदाह निर्मूलनासाठी पुणे 'झेडपी' राबवणार कार्यक्रम

पुणे : दुभत्या जनावरांमध्ये कासदाह आजार मोठ्या प्रमाणात अाढळून येत आहे. यामुळे जनावरांच्या कासेवर परिणाम होऊन दूध उत्पादनात घट होते. यावर नियंत्रण आणण्यासाठी जिल्हा परिषदेच्या वतीने यंदापासून कासदाह निर्मूलन कार्यक्रम राबविण्यात येणार आहे, अशी माहिती जिल्हा पशुसंवर्धन अधिकारी डाॅ. श्रीराम पवार यांनी दिली.   

कासदाह हा जिवाणूजन्य आजार असून, तो दुभत्या जनावरांमध्ये आढळून येतो. जनावराची धार काढल्यानंतर ते लगेच खाली बसते. त्या वेळी गोठ्यातील जमिनीवर असलेले रोगकारक जीवाणू जनावरांच्या सडातून आत प्रवेश करतात. दुभत्या जनावरांच्या ज्या सडात जीवाणू पसरतात त्यातून दूध येणे बंद होते. एका सडातून दूध येणे बंद झाले तरी २५ टक्के दूध उत्पादनाला फटका बसतो. वेळीच निदान व उपचार झाल्यास या आजारावर नियंत्रण मिळविणे शक्य आहे. याविषयी शेतकऱ्यांमध्ये जनजागृती करण्यात येणार आहे. 

कासदाह निर्मूलन कार्य्रकमासाठी जिल्हा परिषदेने यंदाच्या अंदाजपत्रकात ४० लाख रुपयांची तरतूद करण्यात आली आहे. तसेच पशुजन्य उत्पादनांसाठी नवीन ब्रॅंड विकसित करणे, उत्पादनांना बाजारपेठ उपलब्ध करून देत शेतकऱ्यांच्या उत्पन्नात वाढ करणे, या उद्देशाने राबविण्यात येणाऱ्या पशुधन विकास कार्यक्रमासाठीही दहा लाख रुपयांची तरतूद करण्यात आली अाहे, असे डॉ. पवार यांनी सांगितले.