पशुधन सहायकांच्या पदोन्नतीप्रकरणात न्यायाधिकरणाने दिला ‘स्टेटस-को’

पशुधन सहायकांच्या पदोन्नतीप्रकरणात न्यायाधिकरणाने दिला ‘स्टेटस-को’
पशुधन सहायकांच्या पदोन्नतीप्रकरणात न्यायाधिकरणाने दिला ‘स्टेटस-को’

नागपूर : निकष डावलून राज्यातील पशुधन सहायकांना वर्ग-१ पदी देण्यात आलेल्या पदोन्नतीप्रकरणात महाराष्ट्र प्रशासकीय न्यायाधिकरणने (मॅट) ‘जैसे थे''चे (स्टेटस-को) आदेश दिले आहेत. त्यामुळे राज्यात गेल्या आठवडाभरापासून सुुरू असलेले पशुवैद्यकीय विद्यार्थ्यांचे आंदोनल मागे घेण्यात आले आहे. याप्रकरणी ३ एप्रिल रोजी पुढील सुनावणी होणार असून पशुधन सहायक या वेळी आपली बाजू मांडतील.  राज्यात १२५ पशुधन सहायकांना पशुधन विकास अधिकारीपदी नियुक्‍ती देण्यात आली होती. पशुधन सहायक हे पद दहावी नंतर दोन वर्षांचा डिप्लोमा करणाऱ्यांसाठी आहे. त्यामुळे साडेपाच वर्षांचा पशुविज्ञान अभ्यासक्रम पूर्ण करून प्रवेश प्रक्रिया देत राज्य लोकसेवा आयोगाची परीक्षा उत्तीर्ण होत नंतर पशुधन विकास अधिकारी होणाऱ्यांवर हा अन्याय असल्याचा आरोप करण्यात आला. याविरोधात पशुविज्ञान शाखेच्या विद्यार्थ्यांनी आठवडाभरापासून विविध प्रकारचे आंदोलन केली. त्याची दखल घेतली जात नसल्याने या विरोधात न्यायाधिकरणामध्ये याचिका दाखल करण्यात आली.  न्यायाधिकरणाने याचिकेची दखल घेत याप्रकरणात परिस्थिती ‘जैसे थे'' ठेवण्याचे आदेश दिले आहेत. हा विद्यार्थ्यांचा मोठा विजय मानला जात आहे. १२५ पैकी केवळ ८ ते १०  पशुधन सहायकांनीच पदभार स्वीकारला आहे. त्यामुळे उर्वरित पशुधन सहायकांना न्यायाधिकरणाच्या आदेशामुळे आता पदभार स्वीकारता येणार नाही. दरम्यान, पशुसंवर्धन सचिव अनुपकुमार यांनी पदोन्नती नियमानुसार असल्याचे महाराष्ट्र पशु व मत्स्य विज्ञान विद्यापीठाचे कुलगुरू डॉ. आशिष पातूरकर यांना लेखी कळविले होते. याप्रकरणी ३ एप्रिल रोजी सुनावणी होणार असली तरी न्यायाधिकरणाने दिलेला स्टेटस-को (जैसे थे आदेश) आचारसंहितेपर्यंत राहणार आहे.

पशुधन सहायकाकरिता पदोन्नतीसाठी त्यांच्या शैक्षणिक पात्रतेचा विचार करून स्वतंत्र कॅडर निर्माण करावे. ज्याप्रमाणे आरोग्य विभागात परिचारिका (नर्स), सहायक परिचारिका, वरिष्ठ परिचारिका अशी पदोन्नती दिली जाते. आजपर्यंत कोणत्याही परिचारिकेला किती वर्षाची सेवा दिली तरी डॉक्‍टर म्हणून मान्यता दिली जात नाही. मग पशुंच्या आरोग्य क्षेत्रात असे का घडावे ?'' - तेजस वानखडे, अध्यक्ष, महाराष्ट्र पशुविज्ञान शाखा विद्यार्थी संघटना.

परिचारिकेला डॉक्‍टरचा दर्जा आरोग्य सेवेत मिळत नसताना मग पशुआरोग्य क्षेत्रात असे का घडावे ? हा सोपा आमचा प्रश्‍न आहे. त्याविरोधात आम्ही आवाज उठविला आहे. न्यायाधिकरणाने आमच्यावरील अन्यायाची दखल घेत आम्हाला न्याय दिला. न्यायपालिकेवर आमचा विश्‍वास असून यापुढील कायदेशीर लढाईदेखील आम्हीच जिंकू. - डॉ. चेतन अलोने

पदोन्नतीसाठी कॅडर एक सारखे असणे गरजेचे आहे. परंतु, पशुधन विकास अधिकारीपदी पदोन्नतीसाठी मात्र निकष डावलण्यात आले आहेत. पशुधन सहायक ते थेट डॉक्‍टर अशी पदोन्नती कशी दिली जाऊ शकते. सर्वसामान्य सुशिक्षितांनी देखील ही बाब अन्यायकारक असल्याचे चटकन लक्षात येईल. - डॉ. अक्षय बिंड

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com