लोकपाल, हमीभावासाठी अण्णांचा रामलीलावर एल्गार

नवी दिल्ली : लोकसभा निवडणुकीत आश्वासन देऊनही मोदी सरकारने गेल्या चार वर्षांत लोकपालची अंमलबजावणी तसेच शेतकऱ्यांना हमीभाव, स्वामिनाथन आयोगाची अंमलबजावणी केली नाही. या मागण्यासांठी जष्ठ सामजसेवक अण्णा हजारे हे शुक्रवार (ता. २३) पासून येथील रामलीला मैदानावर आंदोलनाला बसले आहेत. या आंदोलनामुळे मोदी सरकारच्या अडचणी वाढण्याची शक्यता आहे.   उपोषणाला बसण्यापूर्वी अण्णा हजारे यांनी मोदी सरकारवर जोरदार टीका केली. ते म्हणाले, की गेल्या ३५ ते ४० वर्षांपासून आंदोलन करतोय. आंदोलनावेळी कधीही, कुठलाही हिंसाचार झालेला नाही. पण हे सरकार रामलीला मैदानावर आंदोलनासाठी येणाऱ्या कार्यकर्त्यांच्या बसेस, रेल्वे रोखत आहे. पोलिसांचा मोठा बंदोबस्त ठेवला आहे. आमच्या आंदोलनात अडथळे आणले जात आहेत. लोकशाहीचा गळा घोटला जात आहे.  ‘‘आंदोलनात येणाऱ्या लोकांशी गैरवर्तणूक केली जात आहे. त्यांना आंदोलनात येण्यापासून रोखले जात आहे. आमच्या आंदोलनात खोडा घालण्याचा प्रयत्न सरकार करत आहे. देश व लोकशाहीसाठी भगतसिंग यांनी बलिदान दिले. इंग्रज गेले पण देशात लोकशाही काही अजून आलेली नाही. त्यांचे लोकशाहीचे स्वप्न आम्ही पूर्ण करण्याचा प्रयत्न करत आहोत. पण हे सरकार आमचे आंदोलन दाबण्याचा प्रयत्न करत आहे. पण आम्ही भगतसिंगांचे बलिदान वाया जाऊ देणार नाही,’’ असेही त्यांनी स्पष्ट केले. आतापर्यंत आमच्या आंदोलनात कधीच हिंसाचार झालेला नाही. पण सरकारला काय अनुभूती आली काय माहीत असा सवाल उपस्थित करत आमच्या लोकांच्या बसेस आणि रेल्वे रोखण्यात येत असल्याचा आरोप केला. लोकशाहीसाठी हे ठीक नसल्याचे ते म्हणाले. दरम्यान, आंदोलनाला सुरवात करण्यापूर्वी अण्णा हजारे यांनी राजघाट येथील महात्मा गांधीजींच्या समाधिस्थळावर जाऊन दर्शन घेतले. त्यानंतर आंदोलनाला सुरवात केली. तसेच अण्णांनी आंदोलन थांबवावे, यासाठी भाजपाने प्रयत्न सुरू केले होते. मात्र देशात चार वर्षांपासून पत्रव्यवहार करूनही प्रतिसाद मिळत नसताना आता पोकळ आश्वासनांचा काय उपयोग, असे सुनावत अण्णांनी आंदोलनावर ठाम असल्याचे सांगितले होते.