'पहिली उचल ३४०० रुपये जाहीर करा'

सातारा : या वर्षीची पहिली उचल ३४०० रुपये प्रतिटनप्रमाणे जाहीर करावी, मगच जिल्ह्यातील साखर कारखान्यांनी ऊस तोडणी सुरू करावी, असे आदेश जिल्हाधिकाऱ्यांनी द्यावेत, अशी मागणी स्वाभिमानी शेतकरी संघटनेने निवेदनाद्वारे निवासी उपजिल्हाधिकारी भारत वाघमारे यांच्याकडे केली आहे. स्वाभिमानीचे जिल्हाध्यक्ष अर्जुनराव साळुंखे आणि सचिन नलवडे यांच्या नेतृत्वाखाली पदाधिकारी व कार्यकर्त्यांनी मंगळवारी (ता. ३१) उपजिल्हाधिकाऱ्यांची भेट घेऊन याबाबत निवेदन दिले.

निवेदनात संघटनेने म्हटले, की स्वाभिमानी शेतकरी संघटनेचे संस्थापक खासदार राजू शेट्टी यांनी जयसिंगपूर येथील १६ व्या ऊस परिषदेत या वर्षी गाळपास येणाऱ्या उसाला पहिली उचल ३४०० रुपये प्रतिटनप्रमाणे घेण्याचा ठराव झाला. सध्या जिल्ह्यातील बहुतांशी साखर कारखाने मोळी टाकून सुरू झाले आहेत.

त्यामुळे तोडणी कामगार ऊस तोडीसाठी सज्ज आहेत; पण ऊस दराची पहिली उचल जाहीर केल्याशिवाय कारखान्यांनी ऊस गाळप तसेच ऊस तोडणी करू नये, असे आदेश द्यावेत.