खरीप पीकविमा परतावाप्रश्नी उच्च न्यायालयामध्ये याचिका

खरिप पिक विमा
खरिप पिक विमा

परभणी: परभणी जिल्ह्यात २०१७ च्या खरिपातील पीक नुकसानीचा परतावा मंजूर करण्यात आलेला नाही. पीकविमा परतावाप्रश्नी उपोषण, धरणे झाली, शासनाने विधिमंडळामध्ये आश्वासन देऊनही शेतकऱ्यांना नुकसानभरपाई मिळालेली नाही. त्यामुळे शेतकरी संघर्ष समितीचे कॉ. राजन क्षीरसागर यांनी केंद्र आणि राज्य सरकार, रिलायन्स जनरल इन्शुरन्स कंपनी, भारतीय विमा नियामक प्राधीकरण (आयआरडीए) यांच्या विरुद्ध उच्च न्यायालयाच्या औरंगाबाद खंडपीठामध्ये जनहित याचिका दाखल केली आहे. या संदर्भात माहिती देतांना कॉम्रेड राजन क्षीरसागर म्हणाले, २०१७ च्या खरीप हंगामामध्ये पंतप्रधान पीकविमा योजनेअंतर्गत परभणी जिल्ह्यातील शेतकऱ्यांनी ३१.१९ कोटी रुपये विमा हप्ता भरला होता. राज्य आणि केंद्र शासन यांचे एकत्रित मिळून २५६.५ कोटी रुपये अनुदान रिलायन्स जनरल इन्शुरन्स कंपनीला देण्यात आले. विमा कंपनीने जिल्ह्यातील ४ लाख २८ हजार हेक्टर क्षेत्रावरील पिकांसाठी १ हजार ४१८ कोटी रुपये विमा परतावा देणे आवश्यक होते. परंतु शेतकऱ्यांना १४८ कोटी रुपये पीकविमा परतावा मंजूर केला. जिल्ह्यातील लिमला, बाभळगाव, आवलगाव आदी मंडळांमध्ये खरीप पिकांचे मोठे नुकसान होऊनही शेतकाऱ्यांना पीकविमा परतावा मंजूर केलेला नाही. राज्य शासनाने सदोष शासन निर्णयाद्वारे रिलायन्स कंपनीची भलावण केली. आंदोलनकर्त्या शेतकऱ्यांना शासनाने दिलेल्या आश्वासनाची पूर्तता केलेली नाही. त्यामुळे शेतकरी संघर्ष समितीचे राजन क्षीरसागर यांनी उच्च न्यायालयाच्या औरंगाबाद खंडपीठामध्ये जनहित याचिका दाखल केली आहे. या प्रकरणी रिलायन्स जनरल इन्शुरन्स कंपनी प्रतिवादी करून घेण्यास परवानगी देण्यात आली. उच्च न्यायालयाने केंद्र शासन, केंद्रीय अर्थमंत्रालय, कृषी मंत्रालय, भारतीय विमा नियामक प्राधिकरण, राज्य शासन, राज्य पीक विमा समिती, कृषी आयुक्त, जिल्हाधिकारी, जिल्हा अधीक्षक कृषी अधिकारी, रिलायन्स जनरल इन्शुरन्स कंपनी यांना नोटिसा बजावल्या असून, येत्या ६ मार्चपर्यंत शपथपत्र दाखल करण्याचे आदेश दिले आहेत.  या याचिकेमुळे राज्य शासनाला पीकविमा परताव्यापासून वंचित शेतकऱ्यांना विमा नुकसानभरपाई देण्यासह धोरणात्मक बदल होऊ शकतील, अशी अपेक्षा याचिकाकर्ते कॉ. राजन क्षीरसागर, जिल्हा परिषद सदस्य श्रीनिवास जोगदंड, रामकिशन दुधाटे यांनी व्यक्त केली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com